जव्हार, ता. ६ (बातमीदार) : गेल्या काही वर्षांपासून ज्या प्रकारे राजकारणाची परिसीमा बदलत चालली आहे, त्याचे वारे जव्हार शहरातदेखील वाहू लागले आहेत. आगामी निवडणुकात डोळ्यांसमोर ठेवून भावी नगरसेवक सदस्यांची संख्या झपाट्याने वाढू लागली आहे. शहर आणि ग्रामीण भागात ठिकठिकाणी बॅनरबाजी सुरू आहे. परिणामी राजकारण तापू लागल्याने मतदारांमध्ये उत्सुकता निर्माण झाली आहे. त्यामुळे या निवडणुकीत इच्छुकांची भाऊगर्दी होणार असल्याचे चित्र एकंदरीत दिसत आहे.

शहरातील विविध भागांत ‘भावी नगरसेवक’, ‘आपला उमेदवार जनसेवक’ अशा आशयांसह लावलेले फलक नागरिकांची लक्ष वेधून घेत आहेत. काही ठिकाणी इच्छुक उमेदवारांकडून वाढदिवस, सत्कार, आरोग्य, रक्तदान शिबिरे अशा निमित्ताने बॅनरबाजी वाढली आहे. त्याचवरोवर सोशल मीडियावरूनदेखील ‘भावी’ उमेदवार स्वतःचे फोटो, कार्याचा आढावा, जनसंपर्क दौरे, समाजकार्याचे व्हिडिओ अपलोड करत असून आपली उपस्थिती अधोरेखित करण्यात येत आहे.

गेल्या काही वर्षात समाजमाध्यमांचे स्थानिक राजकारणात लक्षणीय महत्व वाढले आहे. त्यामुळे प्रत्येक ‘भावी उमेदवारा’ने डिजिटल उपस्थिती वाढवण्यावर भर दिला आहे. प्रचारासाठी मंडळातील स्नेहमिलन, कीर्तन, भजन, शिबिरे यांचा वापर होऊ लागला आहे.

तीन महिन्यांत स्थानिक निवडणुका
राज्यातील स्थानिक स्वराज्य संस्थांच्या निवडणुकांसाठी दिवाळीनंतर म्हणजेच ऑक्टोबर अखेरीस प्रक्रिया सुरू होणार असल्याची माहिती राज्य आयोगाच्या आयुक्तांनी सोमवारी (ता. ४) दिली. त्यामुळे नगर परिषद व जिल्हा परिषद, पंचायत समिती निवडणूक प्रक्रिया वेगाने होणार आहे. या निवडणुका टप्प्याटप्प्याने होतील, असेही चित्र आहे. पालघर जिल्ह्यात विविध कार्यक्रमांच्या माध्यमातून भावी पदाधिकारी पुढे असून, राजकीय हालचालींना वेग आला आहे. बॅनरबाजी आणि समाज माध्यमावरील जाहिरातबाजी पाहता राजकीय वातावरण रंगत असल्याने स्पष्ट होत आहे.