पूर्ववैमनस्यातून शेजारणीला त्रास
नवी मुंबई, ता. ६ (वार्ताहर) : घणसोलीतील एका ४० वर्षीय महिलेने पूर्ववैमनस्यातून शेजारी राहणाऱ्या गतिमंद मुलाला अश्लील चाळे करण्यास भाग पाडले होते. याबाबतचा व्हिडिओ व्हायरल झाल्यानंतर महिलेला अटक करण्यात आली आहे.
घणसोलीतील तक्रारदार महिलेला १० वर्षांचा गतिमंद मुलगा आणि सहा वर्षांची मुलगी आहे. या महिलेचे शेजारी राहणाऱ्या एका महिलेशी काही दिवसांपूर्वी भांडण झाले होते. दोघींमध्ये किरकोळ कारणावरून खटके उडत होते. त्यामुळे राग काढण्यासाठी आरोपी महिलेने गतिमंद मुलाला कपडे काढण्यास भाग पाडताना अश्लील चाळे करण्यास सांगितले. तसेच मोबाईलवर त्याचे चित्रीकरणही केले. हा व्हिडिओ काही दिवसांनंतर समाजमाध्यमांवर व्हायरल झाला होता. त्यानुसार मंगळवारी रबाळे पोलिस ठाण्यात तक्रार दाखल झाल्यानंतर बाल लैंगिक अत्याचार प्रतिबंध कायदा तसेच माहिती तंत्रज्ञान अधिनियमांतर्गत गुन्हा दाखल करण्यात आला.