‘आयटीआय’मध्ये मॅनेजमेंटचे धडे
अल्प मुदतीच्या अभ्यासक्रमांना लवकरच सुरुवात

मुंबई, ता. ६ : राज्यातील आयटीआयमधील विद्यार्थ्यांना पहिल्यांदाच ब‍िझनेस ॲनालिटिक, मार्केटिंग, प्रोडक्शन, फायनान्सियल अशा मॅनजमेंटच्या अभ्यासक्रमाचे धडे मिळणार आहेत. हे तीन ते चार महिन्यांच्या अल्प मुदतीतील अभ्यासक्रम असून, आयटीआयमधील विद्यार्थ्यांना मोफत तर इतर विद्यार्थ्यांना शुल्क आकारून मॅनेजमेंट विषयाचे हे अभ्यासक्रम पूर्ण करता येतील, अशी माहिती रोजगार व कौशल्यविकास मंत्री मंगलप्रभात लोढा यांनी दिली.
राज्य स्टार्टअप आणि नावीन्यता धोरण-२०२५ची घोषणा झाल्यानंतर त्यांनी या धोरणापलीकडे जाऊन पहिल्यांदाच विभागाने मॅनेजमेंट, सॉफ्टवेअर स्किल, सर्व्हिस इंडस्ट्री आणि एआयवर आधारित अशा एकूण २० अल्प मुदतीच्या अभ्यासक्रमांची रचना केली आहे. हे अभ्यासक्रम राज्यातील प्रत्येक आयटीआमध्ये सुरू केले जाणार आहेत. या अभ्यासक्रमांना व्यवसाय इच्छुक विद्यार्थ्यांसोबतच आयटीआय, पदवीचे अभियांत्रिकी, कृषी असे शिक्षण घेणाऱ्या विद्यार्थ्यांना प्रवेश घेता येईल. या अभ्यासक्रमांची प्रवेश प्रकिया आणि प्रत्यक्षात वर्गांना सुरुवात १९ सप्टेंबरदरम्यान होईल, अशी माहितीही मंत्री लोढा यांनी दिली.
...
तीन ते चार महिन्यांचे अभ्यासक्रम
आयटीआयमध्ये पहिल्यांदाच अल्प मुदतीच्या अभ्यासक्रमांमध्ये एआय, सोलार पॅनल इन्स्टॉलेशन मेंटनन्स, ईव्ही मशीन, इंडस्ट्रियल रोबोटिक्स अँड डिजिटल मॅन्युफॅक्चरिंग टेक्निशियन आदी अभ्यासक्रम सुरू होत असून, हे तीन ते चार महिने कालावधीचे आणि सुमारे ४०० तासांपर्यंतचे आहेत. नवीन अभ्यासक्रमांमध्ये मॅनेजमेंट, सॉफ्टवेअर स्किल, सर्व्हिस इंडस्ट्री आणि न्यूएज कोर्सेसमध्ये प्रत्येकी पाच असे २० अभ्यासक्रम असून, राज्यातील प्रत्येक आयटीआयमध्ये जशी मागणी असेल त्याप्रमाणे पाच अभ्यासक्रम निवडून ते उपलब्ध केले जाणार असल्याची माहितीही मंत्री लोढा यांनी दिली.