पालघर, ता. ६ : कामासाठी युरोपमध्ये गेलेल्या पालघरमधील तरुणाला फसवण्यात आल्याचे समोर आले आहे. तेथील एका कंपनीमध्ये वैद्यकीय विम्यासंदर्भात विचारणा केल्यावर त्याला कामावरून काढून मारण्याची धमकी दिली. या धक्कादायक घटनेप्रकरणी त्याने समाजमाध्यमांवर व्हिडिओ प्रसारित करीत मायदेशी परतण्यासाठी मदतीची विनवणी केली आहे.

उमेश किसन धोडी हा तरुण पालघरमधील बच्चू मिया चाळ येथे राहतो. त्याला बडोदा येथील कंपनीकडून एका एजंटच्या वतीने युरोपमधील अल्बानिया या देशातील कंपनीमध्ये नोकरी देण्यात आली, मात्र कंपनीकडून नियमांनुसार कोणतीही सुविधा न मिळाल्याने त्याने आक्षेप घेतला. त्यानंतर त्याला कामावरून काढण्यात आले. त्याने पालघरमधील सामाजिक कार्यकर्ता तुलसी जोशी यांना संपर्क साधून समाजमाध्यमांद्वारे मदतीची मागणी केली.

एका एजंटने मला युरोपमध्ये नेत फसवणूक केली. त्याने आपल्याला कोणतीही मदत केली नाही. मोठ्या कंपनीमध्ये वैद्यकीय विमा का काढला नाही, असे मी विचारल्यावर त्यांनी खोटी माहिती दिली. माझ्यावर खोटे आरोप लावून नोकरीवरून काढण्यात आले. मला मारण्याची धमकी देण्यात येत असून, मायदेशी परतण्यासाठी मदत करण्याची याचना करीत असल्याचे व्हिडिओमध्ये दिसत आहे. तेथील वस्तुस्थिती मांडत असतानाच तो भयभीत असल्याचेही दिसत आहे.

प्रशासनाकडून मदतीचे प्रयत्न
तुलसी जोशी यांनी बडोदा येथील आयुक्तांना संपर्क साधत हकीकत सांगितली. त्यांनी एजंटचा शोध घेत त्याला ताब्यात घेतले आहे. याप्रकरणी अधिक माहिती घेण्याचे काम तेथील यंत्रणा करीत आहेत. पालघरचे पोलिस अधीक्षक यतीश देशमुख यांना ही माहिती मिळाल्यानंतर ही बाब गांभीर्याने घेऊन मदत करण्याच्या दृष्टीने सर्वतोपरी प्रयत्न सुरू केले आहेत, अशी माहिती जोशी यांनी दिली.