पालघर, ता. ७ (बातमीदार) : युरोपातील अल्बानिया देशात अडकलेल्या पालघरच्या उमेश किशन धोडी यांना भारतात परत आणण्यासाठी युद्धपातळीवर प्रयत्न सुरू झाले आहे. ‘सकाळ’मध्ये गुरुवारी (ता. ७) वृत्त प्रकाशित होताच खासदार डॉ. हेमंत सवरा यांनी दखल घेत परराष्ट्र व्यवहारमंत्री डॉ. एस. जयशंकर यांची भेट घेत चर्चा केली. धोडी यांच्या मदतीसाठी सरकारी पातळीवर प्रयत्न करणार असल्याचे खासदारांनी सांगितले.

पालघर येथे राहणारे उमेश धोडी हे अल्बानिया येथे फसवणुकीला बळी पडून अडकले आहेत. सध्या अत्यंत धोकादायक व असुरक्षित परिस्थितीत जीवन जगत असल्याची वस्तुस्थिती त्यांनी व्हिडिओच्या माध्यमातून मांडली आहे. या गंभीर प्रकरणात तातडीने हस्तक्षेप करण्यासाठी खासदार डॉ. सवरा यांनी परराष्ट्र व्यवहारमंत्री डॉ. जयशंकर यांची भेट घेऊन निवेदनाद्वारे त्वरित मदतीची मागणी केली आहे.

धोडी यांना बडोदा येथील एका एजंटमार्फत अल्बानियात नोकरीचे प्रलोभन दाखवून पाठवले गेले होते; मात्र प्रत्यक्षात त्यांच्यावर जबरदस्तीने झाडू मारणे आणि अन्य मेहनतीची कामे लादली गेली. त्यानंतर कोणतीही वैध कारणे न देता त्यांना कामावरून काढून टाकण्यात आले. सध्या त्यांना अन्न, निवास आणि वैद्यकीय मदतीसारख्या मूलभूत सुविधांपासून वंचित ठेवले जात आहे. आपली परिस्थिती गंभीर झाली असून, अल्बानियातील स्थानिक एजंट धोडी यांना मारण्याची धमकी देत आहे. या पार्श्वभूमीवर डॉ. सवरा यांनी सरकारकडे उपाययोजना करण्याची मागणी केली आहे. धोडी यांचा शोध घेत त्यांना भारतात सुरक्षित परतण्यासाठी मदतीसह एजंटवर कारवाईची मागणी केली आहे.