माणगाव, ता. ९ (वार्ताहर)ः माणगावमधील वनवासी कल्याण आश्रमशाळेत रंगीबेरंगी सुंदर असा एक पक्षी आला होता. शाळेच्या आवारात हा पक्षी पाहण्यासाठी मुलांनी गर्दी झाली. शाळेचे अधीक्षक विलास देगावकर यांनी पक्ष्याला सुरक्षितपणे अधिवासात सोडले; पण दुसऱ्या दिवशी पुन्हा हा पक्षी शाळेत आल्याने विद्यार्थ्यांसोबतची मैत्री कुतूहलाचा विषय बनली आहे.
रायगड जिल्ह्यातील अनेक ठिकाणचे आदिवासी पाडे, गावांमधून आलेले विद्यार्थी शिकत आहेत. भौगोलिकदृष्ट्या वेगवेगळ्या भूप्रदेशात हे आदिवासी विद्यार्थी येत असल्याने जंगल परिसराची त्यांना चांगलीच ओळख असते. अशातच शाळेत अचानक आलेल्या पाहुण्याने या पक्ष्याबद्दल प्रचंड उत्सुकता मुलांमध्ये दिसून आली. या वेळी वन्यजीव अभ्यासक शंतनू कुवेसकर यांनी एका खोक्यामध्ये ठेवलेल्या पक्ष्याला बाहेर काढत पाहणी केली. हा पक्षी तंदुरुस्त होता; पण अपरिपक्व पिल्लू असल्याने ते उडू शकत नव्हते.
------------------------------------------
पक्ष्यांचा वावर
पावसाळी दिवसात तिबोटी खंड्या पक्ष्यांचा विणीचा हंगाम असतो. दक्षिणेकडून हे पक्षी मुख्यतः स्थलांतर करून कोकणात तसेच अगदी मुंबई ते गुजरातच्या सीमेपर्यंत नैसर्गिक आवासांमध्ये येतात. वनवासी कल्याण आश्रमशाळेच्या आजूबाजूला जवळच मुबलक असा नैसर्गिक अधिवास उपलब्ध असल्याने या पक्ष्यांचा येथे वावर आहे.
---------------------------
मुलांचा आनंद गगनात मावेना
पिल्लू लहान, शिकाऊ असल्यामुळे चुकून भरकटून शाळेच्या आतील परिसरात येऊन शाळेतील व्हरांड्यात असलेल्या आरशाला धडकले होते. या वेळी विद्यार्थ्यांनी पक्ष्याला नैसर्गिक अधिवासात जाऊन मोकळे सोडताच खंड्याचे पिल्लू भरारी घेत स्वैरपणे उडून गेले.