व्यवसाय चांगला होऊदे रे सागर देवता...!
नारळी पौर्णिमेनिमित्त कोळीबांधवांचे नारळ अर्पण करून साकडे
अलिबाग, ता. ९ (वार्ताहर) ः नारळी पौर्णिमेला कोळी समाजामध्ये अत्यंत मानाचे स्थान असून, उपजीविकेचे साधन असलेल्या समुद्राप्रती कृतज्ञता व्यक्त करण्याचा हा सण मानला जात आहे. नारळी पौर्णिमेनिमित्त पारंपरिक कोळी गाण्यांवर नृत्य करीत कोळीबांधवांनी शुक्रवारी (ता. ८) सायंकाळी सागराला नारळ आर्पण केला. आमचा व्यवसाय अधिक वृद्धिंगत होऊ दे, चांगली मासळी मिळू दे, असे साकडे सागराला घातले. पावसाळ्यात दोन महिने बंद असलेला मासेमारी व्यवसाय पुन्हा आता सुरू आहे.
पावसाचे संपूर्ण वेळापत्रकच गेल्या काही वर्षांत बदलू लागल्याने पौर्णिमेच्या पूर्वीच मासेमारीसाठी नौका समुद्रात शिरल्या आहेत. त्यामुळे समुद्राला नारळ अर्पण करून मासेमारीला सुरुवात करण्याचा प्रघात आता केवळ औपचारिकतेपुरता उरला असल्याचे दिसून येत आहे.

नारळ फोडण्याच्या स्पर्धा
नारळी पौर्णिमेचे व्यावसायिक महत्त्व कमी झाले असले तरी या उत्सवाचा उत्साह अजिबात ओसरलेला नाही. जिल्ह्यांतील कोळीवाड्यांत आजही नारळी पौर्णिमा दणक्यात साजरी केली जाते. दर्याराजाला पारंपरिक नारळ अर्पण करण्याचा कार्यक्रम पार पडतो. त्यानंतर नारळ फोडण्याच्या स्पर्धेला सुरुवात होते. परिसरातील सुमारे ३०० पेक्षा अधिक कोळी कुटुंब त्यात उपस्थित राहतात, अशी माहिती जनार्दन नाखवा यांनी दिली.

पोलिस बंदोबस्त तैनात
हार, फुलांनी सजविलेला नारळ सागराला अर्पण करायला निघताना मिरवणुकीत कोणताही अनुचित प्रकार घडू नये, तसेच कोणताही कायदा व सुव्यवस्था बिघडू नये यासाठी योग्य तो पोलिस बंदोबस्त तैनात करण्यात आला होता. या वेळी पोलिस अधिकारी, कर्मचारी, बीटमार्शल व दामिनी पथकाचा समावेश होता.