मनोर, ता. ९ (बातमीदार) : जागतिक आदिवासीदिन मनोर परिसरात मोठ्या उत्साहात साजरा करण्यात आला. या दिनानिमित्त मनोर पोलिस ठाण्याच्या हद्दीतील सावरे, ढेकाळे आणि बोट गावात विविध कार्यक्रमांचे आयोजन करण्यात आले होते. गावोगावी मोटारसायकल रॅली आणि आदिवासी क्रांतिवीरांच्या प्रतिमांचे पूजन करण्यात आले. आदिवासी एकता मित्र मंडळाच्या वतीने मनोर गावात रॅलीचे आयोजन करण्यात आले होते. विविध गावांमधील मिरवणुकांमध्ये डीजेच्या तालावर ग्रामस्थ आणि तरुणांनी तारपा नाच केला.

चिल्हार फाटा येथे ग्रामस्थ आणि श्रमजीवी संघटनेच्या वतीने राघोबा भांगरे चौकाचे नूतनीकरण करण्यात आले. या वेळी तारपा नृत्य आणि सांस्कृतिक कार्यक्रम आयोजित करण्यात आला होता. सावरे एम्बुर, टेन, टाकवाहाल, सावरखंड, पोळे नवी दापचरी गावांच्या तरुणांना एकत्र येत मोटारसायकल रॅली काढण्यात आली होती. रॅलीचा समारोप मस्तान नाका येथे सांस्कृतिक कार्यक्रमाने करण्यात आला. या वेळी टेन ग्रामपंचायतीचे सरपंच सदू गणेशकर, माजी पंचायत समिती सदस्य पांडुरंग गोवारी आणि मोठ्या संखेने आदिवासी बांधव उपस्थित होते.

आदिवासी एकता मित्र मंडळाच्या वतीने आयोजित कार्यक्रमात मनोर पोलिस ठाण्यालगतच्या बिरसा मुंडा चौकात मुंडा यांच्या प्रतिमेचे पूजन करण्यात आले. या वेळी पारंपरिक वेशभूषेतील आदिवासी बांधवांनी डीजे सांगड, गौरी नाच आणि तारपा नृत्य केले. कार्यक्रमात मनोर पोलिस ठाण्याचे निरीक्षक रणवीर बयेस, संतोष जनाठे, सरपंच चेतन पाटील, दामोदर कासट उपस्थित होते.