बेस्ट वसाहतींमधील घरे खासगी कंपन्यांच्या कामगारांना?
दि बीईएसटी वर्कर्स युनियनचा विरोध
सकाळ वृत्तसेवा
मुंबई, ता. १० ः बेस्ट उपक्रमाच्या वसाहतींमधील निवासी घरे खासगी कंपन्यांना भाडेतत्त्वाने देण्याचा बेस्ट प्रशासनाचा विचार सुरू असून त्याला कामगार संघटनांनी विरोध दर्शविला आहे. बेस्ट कर्मचारी वसाहतींचा मूळ उद्देश बेस्ट कर्मचाऱ्यांच्या गरजा पूर्ण करणे हाच आहे आणि तो कायम ठेवावा, अशी मागणी मुख्यमंत्री देवेंद्र फडणवीस यांच्याकडे दि बीईएसटी वर्कर्स युनियनचे सरचिटणीस शशांक राव यांनी केली आहे.
बेस्ट उपक्रमाच्या अखत्यारीतील असलेल्या कर्मचारी वसाहतींमधील निवासी घरे खासगी कंपन्यांना भाडेतत्त्वाने देण्याचा विचार सुरू आहे. या संभाव्य निर्णयाबद्दल बेस्ट अधिकारी आणि कर्मचाऱ्यांमध्ये प्रचंड नाराजी आणि चिंता पसरली आहे, असे राव यांनी मुख्यमंत्री फडणवीस यांना पाठविलेल्या पत्रात म्हटले आहे.
बेस्ट कर्मचाऱ्यांसाठी या वसाहती तयार करण्यात आल्या होत्या, कामगारांना कामाच्या ठिकाणी जवळ आणि परवडणाऱ्या दरात राहण्याची सोय उपलब्ध होईल. या निर्णयामुळे बेस्ट कर्मचाऱ्यांच्या मूलभूत हक्कांवर गदा येत असल्याचे राव यांनी म्हटले आहे. या संभाव्य निर्णयाचा त्यांनी निषेध केला आहे.
बेस्ट कर्मचाऱ्यांसाठी निवासाची कमतरता भासेल. त्यांना इतरत्र अधिक भाड्याने घरे शोधावी लागतील.

वसाहतीमध्ये खासगी कंपन्यांचे कर्मचारी राहायला आल्यास रहिवाशांमध्ये असुरक्षिततेची भावना निर्माण होईल, वसाहतीतील शांतता आणि सौहार्दपूर्ण वातावरणाला बाधा येण्याची भीती त्यांनी व्यक्त केली आहे.
- शशांक राव, सरचिटणीस
बीईएसटी वर्कर्स युनियन