शहापूर, ता. १० (वार्ताहर) : ऑनलाइन प्रवेश प्रक्रियेमुळे आधीपासूनच विलंब झाल्याने प्रवेशित विद्यार्थ्यांचे नुकसान होऊ नये, म्हणून शिक्षण संचालकांनी अकरावीचे वर्ग सोमवारी (ता. ११)पर्यंत सुरू करण्याचे आदेश दिले होते. त्यानुसार आता शहापूर तालुक्यातील सर्वच शाळा व महाविद्यालयांना वर्ग सुरू करावेच लागणार आहेत. अन्यथा, कारवाईला सामोरे जावे लागेल, असा इशारा शिक्षण संचालकांकडून देण्यात आला आहे.
आतापर्यंत अकरावीचे शहापूरमध्ये ९० टक्के प्रवेश पूर्ण झाले आहेत. त्यामुळे वर्ग सुरू करण्याचा मार्गही मोकळा झाला आहे. उर्वरित शिल्लक असलेले प्रवेश आता वेगाने होत असल्याने पुढील ओपन टु ऑल फेरीत ते पूर्ण होण्याचा अंदाज महाविद्यालयांनी व्यक्त केला आहे. सोमवारी वर्ग सुरू होणार असल्याने अकरावीच्या विद्यार्थ्यांची वह्या, पुस्तके आणि दप्तराची बॅग घेण्याची लगबग सुरू झाली आहे.

सुधारित फेरी
अकरावीच्या प्रवेश प्रक्रियेसाठी शिक्षण विभागाने ओपन टू ऑल सुधारित फेरीचे वेळापत्रक जाहीर केले आहे. अद्याप प्रवेश न मिळालेल्या विद्यार्थ्यांसाठी ही फेरी आहे. त्यात उर्वरित विद्यार्थ्यांना प्रवेश दिला जाणार आहे. यामध्ये पुरवणी परीक्षेत उत्तीर्ण झालेल्या विद्यार्थ्यांचाही समावेश असेल. नव्या वेळापत्रकानुसार ११ ऑगस्टला सायंकाळी सहा वाजेपर्यंत ही प्रवेश प्रक्रिया राबवण्यात येणार आहे. प्रवेशासाठी विद्यार्थ्यांना मिळालेल्या पुढील फेरीमध्ये पुन्हा पसंतीक्रम देण्याची संधी यानंतर मिळणार आहे. दुसऱ्या दिवशी मंगळवाली (ता. १२) रिक्त जागा प्रदर्शित करण्यात येणार आहेत. या रिक्त जागांवर पुन्हा खुली प्रवेश प्रक्रिया राबविण्यात येणार आहे. त्याचे वेळापत्रक नंतर जाहीर करण्यात येणार आहे.