शहापूरमध्ये आदिवासी क्रांतिवीरांचे स्मारक बांधण्याची मागणी
शहापूर, ता. १० (वार्ताहर) : शहापूर तालुका अनुसूचित जमाती क्षेत्रात मोडतो. येथील आदिवासी समाज आजही आपली संस्कृती व परंपरा जपतो. तालुक्यात छत्रपती शिवाजी महाराजांचे स्मारक आणि डॉ. बाबासाहेब आंबेडकर स्मृतीस्तंभ नागरिकांना इतिहासाची जाणीव करून देतात. मात्र, आदिवासी क्रांतिवीरांच्या स्मारकांचा अभाव असल्याने तो उभारण्याची मागणी श्रमजीवी संघटनेने केली आहे. शनिवारी (ता. ९) ‘आदिवासी दिना’निमित्त तालुकाध्यक्ष मालु हूमने, सचिव प्रकाश खोडका, लक्ष्मण चौधरी, विशाल मुकणे, इश्वर बनसोडे, रूपेश अहिरे आदींनी तहसीलदारांना निवेदन दिले. नायब तहसीलदार वसंत चौधरी यांनी हे निवेदन स्वीकारले. संघटनेने निवेदनात म्हटले आहे की, शहापूरमध्ये आदिवासी क्रांतिवीरांचे स्मारक उभारल्यास समाजाच्या स्वाभिमानाला बळ मिळेल. तसेच उंब्रई येथील इतिहासाचे साक्षीदार परंतु दुर्लक्षित राघोजी भांगरे यांच्या समाधीस्थानाचा तातडीने जीर्णोद्धार करावा. हे स्थळ श्रद्धास्थळ घोषित करून रस्ता, पिण्याचे पाणी, प्रकाश व्यवस्था, स्वच्छता आणि माहिती फलक यांसारख्या सुविधा उपलब्ध कराव्यात, अशी मागणी करण्यात आली आहे. स्थानिक नागरिकांनीही या मागण्यांना पाठिंबा दर्शवला असून, प्रशासनाने तातडीने सकारात्मक पावले उचलावीत, अशी अपेक्षा व्यक्त होत आहे.