राजकीय नेत्यांच्या कार्यालयाबाहेर वाहने उभी करणाऱ्यांना नोटिसा
कल्याण, ता. १० (बातमीदार) : वाहतूक विभागाने राजकीय पक्षांच्या आणि निवासस्थानाबाहेरील रस्त्यांवर वाहने उभी करणाऱ्या संबंधितांना लेखी नोटिसा बजावल्या आहेत. भविष्यात अशा प्रकारे वाहने उभी न करण्याची विनंती केली आहे. वाहतूक विभागाकडे आलेल्या तक्रारीवरून या नोटिसा बजावण्यात आल्या असून, यापुढे कार्यवाही होणार का, हे पाहावे लागणार आहे.
राज्य शासनाच्या आपले सरकार या ऑनलाइन पोर्टलवर एकाने तक्रार केली असल्याची माहिती आहे. या तक्रारीत राजकीय व्यक्तींच्या कार्यालय आणि निवासस्थानाबाहेर रस्त्यालगत पार्क होत असलेल्या वाहनांमुळे वाहतूक कोंडी होत असून, नागरिकांना नाहक त्रास होत असल्याचे सांगितले आहे. या तक्रारीची दखल घेत राजकीय कार्यालयाबाहेर वाहने उभी करणाऱ्यांवर सक्त कायदेशीर कारवाई करण्याबाबत वरिष्ठ कार्यालयाकडून आदेश आले आहेत. या अनुषंगाने चक्की नाका येथील ठाणे शहर वाहतूक उपविभाग कोळसेवाडी कार्यालयाचे वरिष्ठ पोलिस निरीक्षक सचिन सांडभोर यांच्या स्वाक्षरीने पुणे लिंक रोड आणि अन्य ठिकाणच्या राजकीय पक्षांच्या प्रमुखांच्या नावे नोटीसवजा विनंती पत्रे देऊन वाहतुकीला अडथळा होणारी वाहने उभी करू नयेत, अशा प्रकारच्या सूचना करण्यात आल्या आहेत.

वाहने बिनदिक्कतपणे रस्त्यावर उभी
कल्याण पूर्वेतील मुख्य रस्त्यांवर अनेक गॅरेज, हॉटेल, बार, मद्यविक्रीची दुकाने आहेत. या ठिकाणी सकाळपासून रात्री उशिरापर्यंत वाहतुकीला अडथळा निर्माण करणारी अनेक वाहने बिनदिक्कतपणे उभी असतात. त्यामुळे यांच्यावरही नियमितपणे कारवाई व्हावी, अशी मागणी पादचाऱ्यांकडून वारंवार केली जात आहे. रस्त्यावर सर्वच ठिकाणच्या वाहनांवर समान कारवाई केली जाते, कुठून कुठून वाहने उचलली जातात याची सर्व माहिती आमच्याकडे असते, असे या वेळी कोळसेवाडी वाहतूक उपशाखेचे पोलिस निरीक्षक सचिन सांडभोर म्हणाले.