वाणगावच्या डिझाईन महाविद्यालयात रंगला राष्ट्रीय हातमाग दिवस
विद्यार्थिनींनी हस्तकलेतून विणल्या कापडी पिशव्या, ग्रामीण भागात रोजगार निर्मितीचा स्त्रोत
वाणगाव, ता. ९ (बातमीदार) : डहाणू तालुक्यातील वाणगाव-आसनगावमधील स्वाती पाटील बॅचलर ऑफ फॅशन डिझाईन महाविद्यालयात राष्ट्रीय हातमाग दिन मोठ्या उत्साहात साजरा करण्यात आला.
हस्तकलेतून पर्यावरणपूरक राखी, पर्स, कापडी पिशव्या व इतर कलाकुसरीच्या वस्तू तज्ज्ञ प्राध्यापकवर्गाच्या मार्गदर्शनातून फॅशन डिझाईन महाविद्यालयात विद्यार्थिनी बनवत आहेत. अल्प दरात विक्री होत असल्याने ग्रामीण भागातील नागरिकांना ते परवडणारे आहे. पर्यावरण संरक्षण आणि प्लॅस्टिक पिशव्यांवर मात करण्यासाठी कापडी पिशव्या तयार केल्या तर ग्रामीण भागात उत्पन्नाचा नवा स्त्रोत निर्माण करता येईल, असे मानसी कोयंडे यांनी सांगितले.
या वेळी संस्थेचे वित्त संचालक लुमेश देसाई यांच्या हस्ते दीपप्रज्वलन करून कार्यक्रमाची सुरुवात करण्यात आली. या वेळी संस्थेचे सहसचिव अक्षय पाटील, कार्यकारी संचालिका तृप्ती पाटील, विश्वस्त सोनालिका पाटील, संस्थेचे कॅम्पस डायरेक्टर डॉ. संकेत धाराशिवकर, डिझाईन महाविद्यालयाच्या प्राचार्य डॉ. सृष्टी मोरया, डॉ. विश्वास पांचाळ, फॅशन डिझायनर प्रा. मानसी कोयंडे, प्रा. वर्षा भिसे, प्रा. शिल्पी झा, प्रा. अश्विनी उघडे, प्रा. रोशनी बोचळ आणि विद्यार्थिनी मोठ्या संख्येने उपस्थित होत्या.
फॅशन डिझायनर प्रा. वर्षा भिसे यांनी आधुनिक युगातील हातमाग तंत्रज्ञानाचे महत्त्व विद्यार्थिनींना पटवून दिले. तृप्ती पाटील यांनी विद्यार्थिनींचे कौतुक केले आणि सृष्टी मोरया यांनी विद्यार्थिनींना मार्गदर्शन केले.