कल्याण रिमॉडेलिंग प्रकल्पाचे काम प्रगतिपथावर
छायाचित्र : संतोष दिवाडकर
कल्याण, ता. १० (बातमीदार) : कल्याण रेल्वे रिमॉडेलिंग प्रकल्पाचे काम वेगाने सुरू असून, प्रकल्प मार्च २०२७ पर्यंत पूर्ण होणार आहे. यामुळे कल्याण स्थानकाचा येत्या दोन वर्षांत संपूर्ण कायापालट होणार आहे. सध्या कल्याण पूर्व भागात नवीन ट्रॅक टाकणे, फूटओव्हर ब्रिजवर कव्हरिंग शेड, डेकचे गर्डर आणि जुन्या गुड्स यार्ड ट्रॅक्स काढून नवीन टाकण्याची कामे सुरू आहेत.
रिमॉडेलिंग प्रकल्पात एक्स्प्रेस आणि लोकल गाड्यांसाठी नवीन व स्वतंत्र फलाटांची बांधणी, गुड्स यार्डसाठी वेगळ्या रिसेप्शन आणि डिस्पॅच लाइन, तीन नवीन फूटओव्हर ब्रिज, फलाटांवर मोठ्या स्लॅबचे बांधकाम, एलिवेटेड डेक/सॅटिस प्रकल्पाचाही समावेश आहे. हे काम २०२७ पर्यंत पूर्ण व्हावे, अशीच शहरवासीयांची अपेक्षा आहे.