धावत्या रिक्षावरील स्टंटबाजी महागात
दोन तरुणांवर गुन्हा दाखल
नवी मुंबई, ता. १० (वार्ताहर) : सोशल मीडियावर लाइक्स आणि फॉलोअर्स मिळवण्यासाठी तरुणाईकडून धोकादायक स्टंट्स करण्याचे प्रकार वाढत आहेत. अशाच एका घटनेत, नवी मुंबईतील दोन तरुणांनी चालकाविना धावत्या रिक्षाच्या हूडवर बसून धोकादायक स्टंट करत त्याचा व्हिडिओ सोशल मीडियावर व्हायरल केला होता. हा व्हिडिओ तुर्भे पोलिसांच्या निदर्शनास येताच त्यांनी तातडीने कारवाई करत या दोन्ही तरुणांवर गुन्हा दाखल केला आहे.
याप्रकरणी व्यवसायाने मेकॅनिक समशुद अहमद मकसूद अहमद (वय २७) आणि रिक्षाचालक अक्षय पांडुरंग धोत्रे (वय २६) यांना अटक करण्यात आली आहे. खैरणे एमआयडीसी परिसरात शुक्रवारी (ता. ८) रात्री साडेबारा वाजण्याच्या सुमारास ही स्टंटबाजी करण्यात आली होती. यामध्ये समशुद हा रिक्षाच्या हूडवर बसून स्टंट करत होता, तर अक्षयने त्याला चिथावणी देऊन स्वतःच्या मोबाईलवर व्हिडिओ शूट करून तो इन्स्टाग्रामवर व्हायरल केला. या धोकादायक स्टंटमुळे स्वतःच्या आणि इतरांच्या जीविताला धोका निर्माण झाल्याने पोलिसांनी दोघांवर मोटार वाहन कायद्यानुसार गुन्हा दाखल केला आहे.
या तरुणांकडून ‘अशा प्रकारचे स्टंट करू नयेत’ असा दुसरा व्हिडिओ तयार करून तो सोशल मीडियावर व्हायरल करण्यास सांगण्यात आले आहे. यासोबतच, सार्वजनिक ठिकाणी असे धोकादायक स्टंट करणाऱ्यांवर कठोर कारवाई करण्याचा इशाराही पोलिसांनी दिला आहे.

याआधीही पोलिसांची कारवाई
अलीकडच्या काळात नवी मुंबई पोलिसांनी अशा स्टंटबाजांवर सलग कारवाया केल्या आहेत. काही दिवसांपूर्वी खारघर येथे चालत्या कारवर स्टंट करणाऱ्या महिलेवर खारघर पोलिसांनी गुन्हा दाखल केला होता. त्याचप्रमाणे दिघा परिसरात रिक्षावर धोकादायक स्टंट करणाऱ्या तिघा तरुणांना रबाळे एमआयडीसी पोलिसांनी ताब्यात घेतले होते. तसेच पामबीच मार्गावर भरधाव कारवर स्टंट करणाऱ्या तिघा महाविद्यालयीन तरुणांवर सानपाडा पोलिसांनी कारवाई केली होती.