पालघर, ता. १० (बातमीदार) : महाराष्ट्रातील महिला सबलीकरणाच्या दिशेने एक महत्त्वपूर्ण पाऊल उचलत ‘वीरांगना राणी दुर्गावती महिला सबलीकरण व सक्षमीकरण योजने’चा लोकार्पण सोहळा वातावरणात पार पडला. या कार्यक्रमाच्या निमित्ताने जिल्हास्तरासाठी पालघर जिल्हाधिकारी कार्यालयातील जिल्हा नियोजन भवन येथे विशेष कार्यक्रमाचे आयोजन करण्यात आले. या वेळी जागतिक आदिवासी दिनानिमित्त भगवान बिरसा मुंडा, राणी दुर्गावती, राघोजी भांगरे, तंट्या भिल, नाग्या कातकरी, ख्वाजा नाईक, वीर बाबुराव शेडमाके, तीलका मांझी यांच्या प्रतिमेचे पूजन करून आदिवासी दिन उत्साहात साजरा करण्यात आला.

जव्हार व डहाणू प्रकल्पातील बचत गटांतील महिला भगिनींनी या कार्यक्रमात उत्स्फूर्त सहभाग नोंदवला. महिलांच्या सबलीकरणाच्या उद्देशाने राबविण्यात येणाऱ्या या योजनेतून ग्रामीण व आदिवासी भागातील महिलांना आर्थिक स्वावलंबनाची नवी दिशा मिळणार आहे. या वेळी निवासी उपजिल्हाधिकारी सुभाष भागडे, सहाय्यक प्रकल्प अधिकारी मधुकर जागले, दिपक टिके, बन्सीलाल पाटिल, कार्यालय अधीक्षक योगेश भोये, सुचिन संखे, संशोधन सहाय्यक जगदीश पाटिल, तसेच डहाणू व जव्हार प्रकल्प आदिवासी विकास निरीक्षक आणि कर्मचारी उपस्थित होते. कार्यक्रमात महिलांना योजनेविषयी सविस्तर माहिती देण्यात आली व त्यांना स्वावलंबनाकडे वाटचाल करण्यासाठी प्रोत्साहन देण्यात आले.