विद्युत मनोरा प्रकल्पबाधितांची आज बैठक
भिवंडी, ता. १० (वार्ताहर) : बाभळेश्वर–पडघे (एम) ४०० के.व्ही. डबल सर्किट लाईन बोईसर-२ प्रकल्पांतर्गत उभारण्यात येणाऱ्या विद्युत मनोऱ्यांमुळे भिवंडी तालुक्यातील २० गावांतील शेतकऱ्यांच्या जमिनी बाधित होत आहेत. बाधित जमिनींच्या मूल्यांकन व दर निश्चितीबाबत चर्चा करण्यासाठी सोमवारी (ता. ११) दुपारी ३.३० वाजता भिवंडी उपविभागीय अधिकारी अमित सानप यांच्या दालनात बैठक होणार आहे. या बैठकीस सर्व प्रभावित शेतकऱ्यांनी उपस्थित राहावे, असे आवाहन कंपनीकडून करण्यात आले आहे.
या प्रकल्पाचे काम खावडा ४सी पावर ट्रान्समिशन लि., कल्याण यांच्याकडून सुरू आहे. प्रकल्पामुळे रवदी, आंबाडी, दिघाशी, दलोंडे, चाणे, खारिवली, जांभिवली (तर्फे खंबाळे), किरवली दुरवली, लाप बु., खालिंग बु., दलेपाडा, चिंचवली (तर्फे राहुर), देवळी, भोकरी, डोहळे, पडघा, आन्हे, वांद्रे व भादाणे या गावांतील जमिनी प्रभावित होत आहेत. बैठकीत दरनिर्धारण, भरपाई पद्धती, तसेच जमिनीच्या वापरावरील अटी याबाबत चर्चा होईल. तसेच शेतकऱ्यांच्या शंका व आक्षेप नोंदविण्याची संधी दिली जाईल.