गणपती विसर्जनाला ठाण्यात अडथळे
घोडबंदर, नाशिक मार्गावरील कामांचे विघ्न
राजीव डाके : सकाळ वृत्त सेवा
ठाणे, ता. ११ : मुंबईतील अनेक गणेशोत्सव मंडळांना गणेशमूर्तींचे विसर्जन करण्यासाठी गिरगाव चौपाटीवर जाणे शक्य नसल्यामुळे त्यातील मोठ्या मूर्ती ठाण्यातील पारसिक खाडीमध्ये विसर्जनासाठी आणल्या जातात, मात्र यंदा मुंबई-नाशिक महामार्गावर चालू असलेल्या पादचारी पूल बांधकाम आणि मेट्रो स्थानकांच्या कामांमुळे या पारंपरिक विसर्जन प्रक्रियेत अडथळे येण्याची शक्यता आहे. त्यामुळे अनेक वर्षे एकाच ठिकाणी विसर्जन करणाऱ्या मंडळांना यंदा विसर्जनासाठी ठाण्यातील दुसऱ्या जागेचा आधार घ्यावा लागणार आहे. या परिस्थितीमुळे गणेशोत्सव मंडळ आणि पोलिस तसेच पालिका प्रशासनामध्ये वाद निर्माण होण्याची शक्यता आहे.

मुंबईमध्ये उंच गणेशमूर्तींची मोठी संख्या असते. त्यांच्या विसर्जनासाठी मुंबईकरांना गिरगाव चौपाटी, पवई तलाव यांसारखी ठिकाणे वापरावी लागतात, मात्र घाटकोपर, विक्रोळी, कांजूरमार्ग, भांडुप, नाहूर आणि मुलुंड वॉर्डातील शेकडो गणेशमूर्ती विसर्जनासाठी ठाण्यातील खाडीत आणल्या जातात. मुंबईतील विसर्जनाच्या ठिकाणांपेक्षा ठाण्यातील खारेगाव आणि कोलशेत खाडी सोयीची असल्याने गेल्या अनेक वर्षांपासून या भागातील उंच गणेशमूर्ती विसर्जनासाठी ठाण्यात आणल्या जातात. गायमुख घाट, पारसिक घाट, रेतीबंदर घाट, खारेगाव घाट, कोलशेत घाट, कोपरी घाट आदी ठिकाणी गणेशमूर्तींचे विसर्जन केले जाते. येथे ठाण्यासह मुंबई मधील काही भागातील गणपती/ देवींच्या मूर्ती विसर्जित केल्या जातात.

येणारे अडथळे
घोडबंदर मार्गावरील मेट्रो स्थानक, मुलुंड चेकनाका मेट्रो स्थानक, पादचारी पूल, कामासाठी रस्त्यावर ठेवण्यात आलेले अवजड लोखंडी तुळई, लोखंडी परांची, रस्त्यावर पडलेले खड्डे, सेवा रस्त्याच्या मध्ये येणाऱ्या विद्युत उच्चदाबाच्या तारा-खांब, मुंबई नाशिक मार्गावरील लोढा पादचारी पूल आदी अडथळे येणार आहेत.

येथे होणार विसर्जन
ठाणे आणि मुंबईमधील उंच मूर्तींचे खारेगाव विसर्जन घाटावर विसर्जन न करता ते आता कोलशेत घाटावर केले जाणार आहे. त्यामुळे या ठिकाणी ठाणे महापालिका आणि वाहतूक विभागाकडून मोठी तयारी केली जाणार आहे. दरवर्षी येथे रात्री १ ते २ वाजेपर्यंत विसर्जन होत असे, परंतु आता हे विसर्जन सकाळी ६ ते ७ वाजेपर्यंत सुरू राहणार असल्याचे दिसते.

वादाची शक्यता
वर्षानुवर्षे खारेगाव घाटावर मुंबईमधील मोठ्या मूर्तींचे विसर्जन होते. यंदा यांना विसर्जनाची जागा बदलावी लागणार असल्याने गणेश मंडळ आणि प्रशासनामध्ये वाद होण्याची चिन्हे आहेत.

गणेश मंडळांच्या बैठकीत पारसिककडे जाणाऱ्या रस्त्याची व्यवस्था स्थानिक पोलिस, वाहतूक पोलिस आणि पालिका अधिकारी एकत्र येऊन पाहणी करून ठरवणार आहेत. भांडुप-मुलुंड परिसरातून घरगुती तसेच मोठ्या मूर्ती पारसिक, कोलशेत आणि रायलादेवी कृत्रिम तलाव येथे विसर्जनासाठी आणल्या जातील.
- रवींद्र मांजरेकर, जनसंपर्क अधिकारी, ठाणे महापालिका