विरार, ता. ११ (बातमीदार) : गेल्या पाच वर्षांत महापालिकेच्या निवडणुका पार न पडल्याने वसई-विरारमध्ये राजकीय दहीहंडीचा थरार दिसत नव्हता, परंतु या वेळी विधानसभेवेळी झालेले परिवर्तन आणि महापालिकेच्या आगामी निवडणुका लक्षात घेऊन राजकीय दहीहंडीचा थरार नागरिकांना अनुभवता येणार आहे. शहरातील प्रमुख पक्ष निवडणुकीमुळे तरुणाईचा खेळ असलेल्या दहीहंडी उत्सवाला सढळ हस्ते मदत करताना दिसत आहेत.

सर्वोच्च न्यायालयाने ओबीसी आरक्षणासह स्थानिक स्वराज्य संस्थांच्या निवडणुका घेण्याच्या सूचना राज्य सरकारला केल्या आहेत. त्यामुळे कोणत्याही क्षणी महापालिका निवडणुकांची तारीख जाहीर होण्याची शक्यता आहे. त्याच पार्श्वभूमीवर वसई-विरारमधील राजकीय पक्ष कामाला लागले आहेत. बहुजन विकास आघाडीने ‘क्षितिजोत्सव’च्या माध्यमातून या स्पर्धेत रंग भरले आहेत.

यापूर्वी वसई-विरारमध्ये बहुजन विकास आघाडीकडे एकहाती सत्ता होती. त्यामुळे बहुतेक सर्वच ठिकाणी दहीहंडी उत्सवावर बविआचा प्रभाव होता, परंतु या वेळी बदललेल्या राजकीय समीकरणामुळे यंदाचा दहीकाला राजकीय शक्तिप्रदर्शनाचा उत्सव ठरणार आहे. विविध पक्षांकडून दहीहंडीचा थरार मोठ्या प्रमाणात अनुभवायला मिळणार आहे. बहुजन विकास आघाडीसमोर भाजपचे आव्हान असले तरी महाविकास आघाडीनेदेखील विधानसभा आणि लोकसभा निवडणुकीमध्ये निर्णायक मते घेतली आहेत. त्यामुळे बविआ, भाजपसोबत महाविकास आघाडीदेखील मोठ्या जोमाने या उत्सवाचे आयोजन करून राजकीय शक्तिप्रदर्शन करण्याचा प्रयत्न करणार आहे, मात्र राजकीय दहीकाला कोण जिंकतो व कोण राजकीय हंडी फोडतो, हे निकालावेळीच बघायला मिळणार आहे.