विरार, ता. (बातमीदार) : कला क्षेत्रात किंवा सर्वच क्षेत्रांत वैयक्तिक पातळीवर यश फार मिळते आहे, पण हे स्वान्तः सुख आणि विकास आहे. यात काहीही वाईट नसले तरीही यामुळे एकत्र काम करण्याची स्थिती आपण गमावून बसलो आहोत, असे प्रतिपादन ज्येष्ठ चित्रकार पद्मश्री वासुदेव कामत यांनी विरार येथे केले. विरार पूर्वेच्या विवा इन्स्टिट्यूट ऑफ अप्लाइड आर्ट महाविद्यालयाच्या वतीने कामत यांचा सन्मान सोहळा आयोजित करण्यात आला होता. याप्रसंगी ते बोलत होते. महाविद्यालयाच्या सभागृहात हा कार्यक्रम पार पडला. कामत यांना पद्मश्री पुरस्कारने सन्मानित करण्यात आल्याबद्दल या सन्मान सोहळ्याचे आयोजन करण्यात आले होते. या वेळी सन्मानपत्र देऊन त्यांचा गौरव करण्यात आला.
आपल्याकडे एकत्र येऊन वेरूळ लेणी, अजिंठाची चित्रे किंवा ऐतिहासिक मंदिरे यांची निर्मिती करण्यात आली आहे. त्यामुळे पुन्हा एकत्र येऊन काही अजून निर्माण करू शकतो का, हा प्रश्न त्यांनी उपस्थित केला. तसेच चित्रकलेच्या क्षेत्रात एकत्र येऊन काम करणे होत नसल्याबद्दलही त्यांनी खंत व्यक्त केली. कलाकार आणि कलारसिक यांना जवळ आणण्यासाठी कलाकारांनीच प्रयत्न करायला हवेत. यासाठी मी, आम्ही आणि आपण सर्व अशा प्रकारची भावना सर्वच क्षेत्रांत वृद्धिंगत होण्याची गरज आहे, असे ते म्हणाले. या वेळी कामत यांच्या हस्ते विद्यार्थ्यांना पदवी प्रमाणपत्रे देण्यात आली. तसेच महाविद्यालयाच्या ‘विवा व्हिजन’ या मासिकाचे प्रकाशनही त्यांच्या हस्ते करण्यात आले. पद्मश्री पुरस्काराने सन्मानित कामत सरांचा महाविद्यालयाच्या वतीने सन्मान करताना आनंद होत आहे, अशी भावना महाविद्यालयाच्या प्राचार्य डॉ. संगीता मांजरेकर-पाटील यांनी आपल्या प्रास्ताविकेत व्यक्त केली. या वेळी चित्रकार अनिल ठाकूर आणि चंद्रकांत वणे आदी मान्यवर, प्राध्यापकवर्ग आणि मोठ्या संख्येने विद्यार्थी उपस्थित होते.