कंटेनर शौचालय उभारणीचा मार्ग सुकर
ठाण्यातील १३ ठिकाणी उभारणार शौचालय; प्रशासकीय स्थायी सभेची मान्यता
सकाळ वृत्तसेवा
ठाणे, ता. १२ : शहरातील महिलांना सार्वजनिक ठिकाणी शौचालयाच्या अडचणींवर कायमचा तोडगा काढण्यासाठी ठाणे महापालिकेने महत्त्वपूर्ण पाऊल उचलले आहे. शहरातील १३ वर्दळीच्या ठिकाणी वातानुकूलित कंटेनर शौचालये उभारली जाणार असून, या उपक्रमाला प्रशासकीय स्थायी समितीची मान्यता मिळाली आहे.

ठाणे शहराचे झपाट्याने विस्तारीकरण व नागरिकीकरण होत आहे. तर, शहरात मोठ्या प्रमाणात रहदारी वाढत आहे. अनेकदा बाजारात अथवा शरत एखाद्या ठिकाणी खरेदीसाठी बाहेर पडणाऱ्या नागरिकांची अनेकदा शौचास जाण्याची अडचण निर्माण होते. विशेष म्हणजे सुट्टीच्या दिवशी अनेक नागरिक फिरण्यासाठी बाहेर पडतात. तेव्हा त्यांना गर्दीच्या ठिकाणी शौचास जाण्याची समस्या निर्माण होते. कित्येकदा उपलब्ध असलेले सार्वजनिक शौचालय हे अस्वच्छ असतात. त्यामुळे विशेष करून महिला वर्गाची खूपच अडचण होते. आता ठाणे महापालिकेने उपाय शोधला असून पालिकेच्या घनकचरा विभागामार्फत ठाणे शहरातील वर्दळीची १३ ठिकाण निश्चित करण्यात आली आहे. याठिकाणी शौचालये उभारण्यात येणार आहे. हि शौचालये कंटेनर स्वरूपात व वजनाने हलके असून वातानुकुलीत असणार आहेत. त्याच्या बाजूलाच व्यवसाय करण्यासाठी व्यवसायिक परवाना दिला जाणार आहे. येथे नागरिकांकडे कोणतेही शुल्क घेतले जाणार नाही. या शौचालयाची देखभाल व्यवसायधारक ठेकेदाराच्या मार्फत करण्यात येणार आहेत. या प्रस्तावास ठाणे महापालिकेच्या प्रशासकीय सभेने मान्यता दिली होती. त्यानंतर पालिकेने निविदा प्रक्रिया राबविली होती. यातून ठेकेदार निवडीचा प्रस्ताव पालिका प्रशासनाने प्रशासकीय स्थायी समितीपुढे ठेवला होता. त्यास समितीने मान्यता दिल्याने कंटेनर शौचालय उभारणीचा मार्ग मोकळा झाला आहे.

अत्याधुनिक आणि मोफत सेवा
ही शौचालये कंटेनर स्वरूपात, हलक्या वजनाची आणि वातानुकूलित असणार आहेत.
नागरिकांकडून कोणतेही शुल्क घेतले जाणार नाही.
देखभाल खासगी ठेकेदारामार्फत करण्यात येणार आहे.
शौचालयासोबतच त्याच्या बाजूला व्यवसाय करण्यासाठी परवाना देण्यात येईल, जेणेकरून देखभाल खर्चाची जबाबदारी त्या ठेकेदाराची राहील.

महिलांच्या सुरक्षिततेसाठी महत्त्वाचे पाऊल
सार्वजनिक शौचालयांची अस्वच्छता व अपुऱ्या सोयीमुळे विशेषतः महिलांना मोठ्या त्रासाला सामोरे जावे लागते. या पार्श्वभूमीवर, ठाणे महापालिकेच्या या निर्णयाचे सर्वत्र स्वागत होत आहे.

कुठे-कुठे उभारणार शौचालये?
रहेजा गार्डन
लोकमान्य बस डेपो
तीन हात नाका
नितीन कंपनी
रायलादेवी तलाव
कचराळी तलाव
मासुंदा तलाव
उपवन तलाव
कॅडबरी सिग्नल
वसंतविहार नाका
विवियाना मॉल पदपथ
अंबिका नगर
वृंदावन