दहीहंडीच्या उत्साहावर विरजण
खारघरमधील सार्वजनिक मंडळांनी फिरवली पाठ
खारघर, ता. १३ (बातमीदार) : दहीहंडीच्या उंचीवर घातलेले निर्बंध, रस्त्यावर उत्सवासाठी पोलिस, पालिका प्रशासनाकडून परवानगी मिळत नसल्यामुळे खारघरमधील दहीहंडी उत्सव मंडळांनी दहीहंडी उत्सवाकडे पाठ फिरवली आहे.
खारघर शहर विकसित होत असताना दहीहंडी उत्सव मोठ्या प्रमाणात होत होता. त्यामुळे खारघर, तळोजा आणि एमआयडीसी परिसरातील नागरिक उत्सवाचा आनंद घेताना खरेदीसाठी येत होते. त्यामुळे या काळात दुकानदारांचे व्यवसाय होत होता, मात्र आता राजकीय पक्षांमध्ये दहीहंडी उत्सवाचे प्रमाण कमी झाल्यामुळे व्यवसायावर परिणाम झाला आहे. तसेच वाढत्या वाहनामुळे होणाऱ्या वाहतूक कोंडीमुळे रस्त्यावर उत्सव साजरा करण्यासाठी पोलिस आणि पालिका प्रशासनाकडून परवानगी दिली जात नसल्यामुळे खारघर मध्ये सार्वजनिक दहीहंडी उत्सव मंडळांनी माघार घेतली आहे.
-------------------------------------------
गोविंदा पथकांचा हिरमोड
सिडकोने खारघर शहर विकसित केल्यावर नव्याने निर्माण झालेल्या शेकाप, काँग्रेस, राष्ट्रवादी काँग्रेस, शिवसेना, भाजप, मनसे अशा विविध पक्षाचे कार्यकर्ते विविध मंडळे सार्वजनिक दहीहंडी उत्सव साजरा करत होते. मंडळाकडून लाख रुपयांची रोख बक्षिसे, दुचाकी दिली जात होती, मात्र खारघर वसाहतीमधील दहीहंडी उत्सवाकडे पाठ फिरवल्याने गोविंदा पथकांचा हिरमोड होत आहे.
-----------------------------------------------
शिवसेनेकडून साजरा केला जाणाऱ्या दहीहंडी उत्सवात हंडी फोडणाऱ्या पथकास मोटार सायकल बक्षीस दिली जात असे, मात्र वाहतूक कोंडीमुळे परवानगी मिळत नसल्यामुळे दहीहंडी उत्सव बंद करावे लागले.
- गुरुनाथ पाटील, पदाधिकारी, शिवसेना ठाकरे गट खारघर