इडली-वड्यात सापडली अळी
पोलिसांत तक्रार; स्वच्छतेबाबत गंभीर प्रश्नचिन्ह
सकाळ वृत्तसेवा
डोंबिवली, ता. १३ : कल्याण पश्चिम परिसरातील कर्णिक रोडवरील ‘बंगलोर इडली कॅफे’ या हॉटेलमधून खरेदी केलेल्या इडली-वड्यात जिवंत अळी आढळल्याचा संतापजनक प्रकार उघडकीस आला आहे. विशेष म्हणजे, ग्राहकाने ही तक्रार केल्यानंतर दुकानदाराने त्याला ‘तुला बघून घेतो’ अशी जीवे मारण्याची धमकी दिली. याप्रकरणी महापालिकेने तत्काळ कारवाई करत दुकानातील सर्व खाद्यसाहित्य जप्त केले असून, महात्मा फुले चौक पोलिस ठाण्यात दुकानदाराविरोधात गुन्हा दाखल करण्यात आला आहे.

तक्रारदार प्रथमेश गोरख शिंदे मुलगा यांचा मंगळवारी (ता. १२ ) सायंकाळी ‘बंगलोर इडली कॅफे’ येथून एक वडा सांबर आणि एक इडली प्लेट पार्सल म्हणून घेऊन आला. घरी पोहोचल्यावर कुटुंबीय जेवताना प्रथमेश शिंदे यांना वड्यात जिवंत अळी असल्याचे त्यांच्या निदर्शनास आले. त्यांनी तत्काळ दुकान गाठून मालक लिंगराज लिगे गौडा याला घटनेची माहिती दिली; मात्र दुकानदाराने अरेरावी करत इडली फेकून दिली व तक्रारदाराशी उद्धटपणे वागला. त्यानंतर प्रथमेश शिंदे यांनी ही घटना महानगरपालिकेकडे लेखी स्वरूपात नोंदवली.

तक्रार प्राप्त होताच, कल्याण-डोंबिवली महापालिकेच्या अन्न व औषध विभागाने तत्काळ कारवाई केली. संबंधित दुकानात छापा टाकून संपूर्ण खाद्यसाहित्य जप्त करण्यात आले. अन्नाचे नमुने प्रयोगशाळेत तपासणीसाठी पाठवण्यात आले आहेत. अहवाल आल्यानंतर दोषी आढळल्यास अधिक कठोर कारवाई केली जाईल, असे प्रशासनाकडून सांगण्यात आले. घटनेनंतर संतप्त झालेल्या दुकानदाराने ‘तुला बघून घेतो’ अशी धमकी दिली. त्यामुळे स्वतःच्या सुरक्षेच्या भीतीने प्रथमेश शिंदे यांनी महात्मा फुले चौक पोलिस ठाण्यात तक्रार दाखल केली. पोलिसांनी अदखलपात्र गुन्हा नोंदवून अधिक तपास सुरू केला आहे.

खाद्य सुरक्षेवर प्रश्नचिन्ह
घटनेमुळे कल्याण-डोंबिवलीतील खाद्यपदार्थांच्या गुणवत्ता, स्वच्छता व अन्न सुरक्षा उपायांवर मोठे प्रश्नचिन्ह निर्माण झाले आहे. वाढत्या शहरीकरणाबरोबरच अनेक खाद्य संस्थांमध्ये अस्वच्छतेचे प्रमाण दिवसेंदिवस वाढताना दिसत आहे. नागरिकांच्या आरोग्याशी थेट संबंधित असलेल्या अन्नपदार्थांमध्ये अशा घटना पुन्हा पुन्हा घडणे हे अत्यंत गंभीर बाब मानली जात आहे.