भाईंदर, ता. १३ (बातमीदार) : मिरा-भाईंदरची प्रभागरचना आता राज्य सरकरच्या नगरविकास विभागाकडे सादर झाली आहे. गेल्या आठवड्यात प्रभागरचनेचा आराखडा महापालिकेने ठाणे जिल्हाधिकाऱ्यांकडे सादर केला होता. त्यांनी त्याची तपासणी केल्यानंतर तो मंगळवारी (ता. १२) नगरविकास विभागाकडे सादर करण्यात आला.

आगामी महापालिका निवडणुकीसाठी प्रभागरचना तयार करण्याचे काम महापालिका प्रशासनाकडून जूनमध्ये सुरू करण्यात आले होते. महापालिका आयुक्तांच्या अध्यक्षतेखाली समिती नियुक्त करण्यात आली होती. गुगल मॅपवर प्रभागांचे नकाशे तयार करणे, प्रत्यक्ष जागेवर जाऊन या प्रभागांची हद्द तपासणे आदी कामे समितीकडून करण्यात आली. त्यानंतर प्रभागरचनेचा मसुदा तयार करण्यात आला व गेल्या आठवड्यात ७ ऑगस्टला तो ठाणे जिल्हाधिकाऱ्यांकडे सादर करण्यात आला. महापालिकेने सादर केलेली प्रभागरचना जिल्हाधिकाऱ्यांनी समजावून घेतली व त्याची तपासणी केली. त्यानंतर प्रभागरचनेचा आराखडा मंगळवारी राज्य सरकारच्या नगरविकास विभागाच्या उपसचिवांकडे सादर करण्यात आला. नगरविकास विभागाकडून तो अंतिम तपासणीसाठी राज्य निवडणूक आयोगाकडे जाणार आहे.

नवीन प्रभागरचना २०११ च्या जनगणनेनुसार करण्यात आली आहे. महापालिकेच्या सदस्यसंख्येतही कोणताही बदल झालेला नसून सदस्यसंख्या ९५ रहाणार व प्रभागरचना चार सदस्यीय पद्धतीची आहे. त्यामुळे २०१७ च्या महापालिका निवडणुकीप्रमाणेच २४ प्रभाग असणार आहेत व त्यातील एक प्रभाग तीन सदस्यांचा असणार आहे, मात्र गेल्या निवडणुकीत असलेल्या प्रभागरचनेत यंदा किती बदल होतात, याबद्दल राजकीय वर्तुळात उत्सुकता लागून राहिली आहे.