पालघर, ता. १३ (बातमीदार) : देशाच्या स्वातंत्र्यलढ्यात १४ ऑगस्ट १९४२ रोजी पालघरमध्ये निघालेल्या मोर्चावर ब्रिटिश पोलिसांनी केलेल्या गोळीबारात पाच स्वातंत्र्य सैनिक हुतात्मा झाले होते. त्यांना अभिवादन करण्यासाठी पालघरमध्ये दरवर्षी १४ ऑगस्टला उस्फूर्तपणे बंद पाळून हुतात्म्याला वंदन केले जाते. उद्याही (ता. १४) पालघर शहरात उत्स्फूर्त बंद पाळला जाणार आहे

स्वातंत्र्यलढ्यावेळी ब्रिटिश सरकारच्या दडपशाहीचा निषेध करण्याकरिता पालघर तहसील कार्यालयावर मोर्चा आयोजित केला होता. हा मोर्चा सध्याच्या हुतात्मा चौकाजवळ आल्यानंतर ब्रिटिश पोलिसांनी मोर्चा अडवला, मात्र मोर्चातील आंदोलनकर्त्यांनी पुढे जाण्याचा प्रयत्न केला असता ब्रिटिश पोलिसांनी केलेल्या गोळीबारात सातपाटी येथील काशिनाथ हरी पागधरे, गोविंद गणेश ठाकूर नांदगाव, रामप्रसाद भीमाशंकर तिवारी पालघर, सुकूर गोविंद मोरे सालवड व रामचंद्र महादेव चुरी हे हुतात्मे झाले होते. त्यांना अभिवादन करण्यासाठी तहसील कार्यालयाकडून मूक मोर्चा काढला जातो. हा मोर्चा हुतात्मा चौकाजवळ आल्यानंतर हुतात्म्यांना श्रद्धांजली अर्पण करून ‘खून के हमारे यारो न भूल जाना, खुशियों में अपनी हमपे आसू बहाते जाना’ हे गीत गाऊन झाल्यावर कोणतीही भाषणबाजी न होता सहभागी लोक निघून जातात, ही प्रथा स्वातंत्र्याच्या काळापासून आजपर्यंत सुरू आहे.