भाईंदर, ता. १३ (बातमीदार) : देशात स्वच्छतेचा पहिला क्रमांक मिळवल्यानंतर हा लौकिक कायम ठेवण्याचे मोठे आव्हान मिरा-भाईंदर महापालिकेसमोर आहे. या पार्श्वभूमीवर शहर स्वच्छतेच्या कामात नागरिकांनाही सहभागी करून घेण्याचा निर्णय महापालिकेने घेतला आहे. त्यासाठी स्वच्छ प्रभाग, स्टार रँकिंग व माझा प्रभाग माझी जबाबदारी हे तीन उपक्रम राबवण्यात येणार आहेत. १५ ऑगस्टपासून उपक्रमांची सुरुवात केली जाणार आहे.

केंद्र सरकारच्या स्वच्छ भारत अभियानात मिरा-भाईंदर महापालिकेने तीन ते १० लाख लोकसंख्येच्या गटात देशात पहिला क्रमांक पटकावण्याचा पराक्रम केला आहे. या कामगिरीत सातत्य राखण्याची महापालिकेला आवश्यकता आहे. स्वच्छतेच्या कामात नागरिकांचा अप्रत्यक्ष मोलाचा सहभाग असतो. त्यामुळे नागरिकांना त्यात प्रत्यक्षपणे सहभागी, तर शहर स्वच्छतेत आणखी प्रगती करणे शक्य होणार आहे. यासाठी स्वच्छ प्रभाग, रहिवासी सोसायट्यांसाठी स्टार रॅंकिंग व माझा प्रभाग माझी जबाबदारी हे तीन उपक्रम महापालिका राबवणार आहे. या उपक्रमात सरस ठरणाऱ्यांना महापालिकेकडून बक्षीस दिले जाणार आहे.

‘स्वच्छ भारत’प्रमाणे निकष
स्वच्छ भारत अभियानासाठी लावण्यात येणारे निकष महापालिकेकडून या उपक्रमासाठी लावण्यात येणार आहेत. माझा प्रभाग माझी जबाबदारी उपक्रमात संबंधित प्रभागातील रस्ते स्वच्छ आहेत की नाही, पदपथ मोकळे आहेत की नाहीत, दुभाजकांची स्थिती कशी आहे, नाल्यांवरती झाकणे आहेत की नाही, प्रभागातील उद्याने स्वच्छ आहेत की नाहीत, बस थांबे, स्वच्छतागृहे इत्यादी सार्वजनिक ठिकाणांची निगा राखली जाते की नाही याची पाहणी केली जाणार आहे.

विविध संस्थांचा सहभाग
स्टार रँकिंग स्पर्धेत रहिवासी सोसायट्या, रुग्णालये, उपाहारगृहे, शाळा यांना सहभागी केले जाणार आहे. दररोज निर्माण होणाऱ्या कचऱ्याचे ओला व सुका असे वर्गीकरण होते की नाही, स्वच्छता राखली जाते की नाही, प्लॅस्टिकचा वापर किती केला जातो, टाकाऊ वस्तूंचा पुनर्वापर होतो का असे मुद्दे यात विचारात घेतले जाणार आहेत. माझा प्रभाग माझी जबाबदारी या उपक्रमात स्वच्छतेची सरसकट पाहणी केली जाणार आहे. या सर्वांमध्ये नागरिकांचा सक्रिय सहभाग महापालिकेला अपेक्षित आहे.

स्वच्छतेबाबत जनजागृती करण्यासाठी हे उपक्रम राबवण्यात येणार आहेत. यासंबंधी रहिवासी सोसायट्या, व्यापारी, हॉटेल संघटना, शाळांचे मुख्याध्यापक, रुग्णालय संघटना यांच्याशी प्रशासनाकडून बैठका घेतल्या जात आहेत. आगामी तीन महिने या उपक्रमांचे परीक्षण केले जाणार आहे. त्यानंतर मिळणाऱ्या गुणांनुसार प्रोत्साहनपर पारितोषिके दिली जाणार आहेत.
- डॉ. सचिन बांगर,
उपायुक्त, मिरा-भाईंदर महापालिका