बदलापूर, ता. १३ (बातमीदार) : शहरातील स्वच्छतेच्या स्थितीवर प्रश्नचिन्ह निर्माण करणारा प्रकार बदलापूरमध्ये पाहायला मिळत आहे. अगदी कुळगाव-बदलापूर नगरपालिकेच्या प्रांगणाबाहेरच कचऱ्याचा ढीग साचून राहिला आहे. स्कायवॉकच्या खाली नागरिक सर्रासपणे कचरा टाकून जात असून, पालिका प्रशासनाकडून कोणतीही कारवाई होत नसल्याचे नागरिकांचे म्हणणे आहे.
२०२१ मध्ये पालिकेला ‘स्वच्छ भारत अभियान’ अंतर्गत देशात १४ वा आणि राज्यात दुसरा क्रमांक मिळाला होता. मात्र, त्यानंतर स्वच्छतेकडे पालिकेचे दुर्लक्ष होत असल्याचे चित्र समोर आले आहे. शहरातील बाजारपेठ, चौक परिसर तसेच पालिकेच्या इमारतीच्या बाहेरील आवारासह विविध ठिकाणी कचऱ्याचे ढीग साचलेले आहेत. पालिका प्रशासनाकडून कचरा टाकणाऱ्यांवर दंडात्मक कारवाई किंवा जनजागृती करण्यात येत नसल्याने बेजबाबदार नागरिक दिसेल त्या ठिकाणी कचरा टाकत आहेत. यामुळे शहराचे सौंदर्य आणि स्वच्छतेची प्रतिमा धुळीस मिळत आहे. बदलापूर पुन्हा स्वच्छतेच्या मार्गावर न्यायचे असेल, तर पालिकेने कठोर भूमिका घेत कचरा टाकणाऱ्यांवर तातडीने दंडात्मक कारवाई सुरू करावी, अशी मागणी काही सुजाण नागरिकांनी केली आहे.