कचरा वर्गीकरण केंद्र परिसर अखेर चकाचक
‘सकाळ’च्या वृत्ताची दखल; कचऱ्याचे ढिगारे आणि दुर्गंधीपासून नागरिकांना दिलासा
कांदिवली, ता. १४ (बातमीदार) : कांदिवली पश्चिमेतीन कचरा वर्गीकरण केंद्राची दयनीय अवस्था झाली होती. त्याच्या बाजूलाच आरोग्य केंद्रही आहे. पसरलेले घाणीचे साम्राज्य, दुर्गंधी यामुळे नागरिकांचे आरोग्य धोक्यात आले होते. याबाबत ‘सकाळ’ वृत्तपत्रामध्ये बुधवारी (ता. १३) ‘कचरा वर्गीकरण केंद्राचा ताप’ या मथळ्याखाली बातमी प्रसिद्ध झाली. याची दखल घेत घनकचरा विभागाने तातडीने साफसफाई करून घेतली आणि परिसर स्वच्छ केला.
केडी कम्पाउंड येथे महापालिकेच्या आर दक्षिण विभागाने स्वच्छ भारत अभियानाअंतर्गत ओला आणि सुका कचरा वर्गीकरण केंद्र सुरू केले आहे. परंतु या केंद्राची दुरवस्था झाली असून दुर्गंधी पसरली होती. इस्लाम कम्पाउंड, केडी कम्पाउंड आणि गांधीनगर परिसरातील नागरिकांना दैनंदिन व्यवहारासाठी येथूनच मार्ग आहे. मात्र मार्गाच्या बाजूलाच असलेला कचरा आणि पसरलेल्या दुर्गंधीचा सामना नागरिकांना करावा लागत होता. विशेष म्हणजे बाजूलाच पालिकेचे आरोग्य केंद्रदेखील आहे. कचऱ्याच्या ढिगाऱ्यांमुळे आरोग्य केंद्रात रुग्ण जाऊ शकत नव्हते. अखेर स्थानिकांनी ठाकरे गटाचे शाखाप्रमुख विजय मालुसरे यांना तक्रार केली. याची दखल घेत मालुसरे यांनी संबंधित विभागातील अधिकारी व दत्तक वस्ती योजनेच्या ठेकेदाराला परिस्थिती निदर्शनास आणून दिली.

वृत्ताची दखल
ही बाब ‘सकाळ’ वृत्तपत्रात प्रसिद्ध होताच घनकचरा विभागाने दखल घेत सहाय्यक अभियंता नीलेश पाटील, मुख्य आवेक्षक राजेंद्र राणे यांनी कर्मचाऱ्यांकडून परिसरातील कचरा उचलून साफसफाई करीत औषध फवारणी करून घेतली. यामुळे प्रवाशांसह स्थानिक नागरिकांनी समाधान व्यक्त केले.