‘महाराष्ट्र सखी’चा मंगळागौर सोहळा उत्साहात
मराठमोळ्या फॅशन शोसह पारंपरिक खेळांची रेलचेल
तुर्भे, ता. १४ (बातमीदार) ः पारंपरिक वेशभूषेत सजलेल्या महिलांच्या उत्साहात महाराष्ट्र सखी मंचतर्फे आयोजित मंगळागौरचा श्रावण सोहळा वाशीत रंगतदारपणे पार पडला. संस्थापक अध्यक्ष हेमलता गायकवाड आणि अध्यक्ष रंजना शिंत्रे यांच्या मार्गदर्शनाखाली नुकताच विष्णुदास भावे नाट्यगृहात झालेल्या या कार्यक्रमाने वातावरण सांस्कृतिक रंगाने भरून गेले. या कार्यक्रमाचे ‘सकाळ’ माध्यम प्रायोजक होते.
कार्यक्रमाला सिनेअभिनेत्री हेमांगी राव, अर्चना तेंडुलकर (चित्रपट निर्माती), अभिनेत्री वीणा जामकर तसेच क्रिएटिव्ह स्पार्क सेलिब्रिटी मॅनेजमेंटच्या अश्विनी शेंडगे यांची उपस्थिती लाभली. समाजसेविका नंदिनी विचारे, माजी माविमा अध्यक्ष ज्योती ठाकरे व माजी नगरसेविका विनया म्हात्रे यांसह अनेक मान्यवरांनी कार्यक्रमाची शोभा वाढवली. श्रावण सोहळ्यात पारंपरिक मंगळागौर खेळांसोबत महिलांसाठी मुक्त व्यासपीठ म्हणून मराठमोळा फॅशन शोही उत्साहात पार पडला. नवी मुंबईतील विविध मंगळागौर पथकांसह १५ हून अधिक स्पर्धकांनी उत्स्फूर्त सहभाग नोंदवला. काही पथकांनी महाराष्ट्राच्या संस्कृतीचे दर्शन घडवले, तर काहींनी छत्रपती शिवाजी महाराजांच्या गड-किल्ल्यांची झलक खेळांच्या माध्यमातून सादर केली. फॅशन शोमधील प्रत्येक स्पर्धकाने आपल्या मराठमोळ्या वेशभूषेतून संस्कृतीचे वैभव उलगडले. विजेत्या पथकांना प्रशस्तीपत्र आणि रोख रक्कम देऊन गौरविण्यात आले. उपस्थित महिलांनी सैराट चित्रपटातील गाण्यांवर ठेका धरीत संपूर्ण नाट्यगृहात जल्लोषाचे वातावरण निर्माण केले.