गव्हाण गावाला मिळणार नियमित मुबलक पाणी
सिडकोकडून तातडीने पुरवठ्याचे आश्वासन
पनवेल, ता. १६ (बातमीदार) ः गव्हाण गावात दिवसेंदिवस तीव्र होत चाललेल्या पाण्याच्या समस्येविरोधात गुरुवारी (ता. १४) ग्रामस्थांनी जोरदार जनआक्रोश मोर्चा काढला. या मोर्चानंतर सिडकोकडून गावाला आवश्यक तितका नियमित पाणीपुरवठा करण्याचे आश्वासन देण्यात आले.
गावाला सध्या साडेतीन लाख लिटर पाण्याची गरज असताना पाणीपुरवठा अपुरा आणि कमी दाबाने होत आहे. त्यामुळे अनेक अडचणींना सामोरे जावे लागत होते. या पार्श्वभूमीवर गव्हाण ग्रामस्थांनी ग्रामपंचायत कार्यालयापासून सिडको प्रशासनाच्या निषेधार्थ घोषणाबाजीसह मोर्चा काढला. या वेळी महिलांचा सहभाग लक्षणीय होता.
आंदोलनादरम्यान सिडकोचे सहाय्यक अभियंता आणि वरिष्ठ पोलिस निरीक्षक अर्जुन रजाने यांनी मध्यस्थी करीत सखोल चर्चा केली. त्यानंतर गावाला त्वरित आवश्यक पाणी देण्याचे सिडकोने कबूल केले. ही समस्या कायमची सोडवण्यासाठी हेटवणे जल प्रकल्पातून गव्हाणसाठी स्वतंत्र पाइपलाइन टाकण्याची मागणीही या वेळी झाली. यासंदर्भात येत्या पाच ते सहा दिवसांत सिडकोच्या वरिष्ठ अधिकाऱ्यांसोबत सर्वपक्षीय बैठक होणार असल्याचे माजी विरोधी पक्षनेते प्रीतम म्हात्रे यांनी सांगितले. तत्पूर्वी मोर्चा तात्पुरता स्थगित करण्यात आला असून, त्वरित पाणीपुरवठा सुरू होणार असल्याने ग्रामस्थांनी समाधान व्यक्त केले.

कोट
गव्हाण गावासाठी हेटवणे पाणीपुरवठ्यातून स्वतंत्र नवीन पाइपलाइन टाकण्याची मागणी ग्रामस्थांची आहे. यासंदर्भात लवकरच सिडकोच्या वरिष्ठ अधिकाऱ्यांसोबत बैठकीचे नियोजन करण्यात येणार आहे. तोपर्यंत गावाला मुबलक प्रमाणात योग्य त्या दाबाने सुरळीत पाणीपुरवठा होईल, असे हमीपत्र आम्हाला सिडको प्रशासनाने दिले आहे.
- प्रीतम म्हात्रे, माजी विरोधी पक्षनेते, पनवेल महापालिका