नवी मुंबईत मालमत्ताधारकांना मिळणार ओळखपत्र
उपक्रम राबविणारी नवी मुंबई देशातील पहिली महापालिका
वाशी, ता. १६ (बातमीदार) ः नवी मुंबई महापालिका क्षेत्रातील मालमत्ताधारकांना त्यांच्या मालमत्तेबाबतची सविस्तर माहिती देणारे मालमत्ता ओळखपत्र उपलब्ध करून देण्याच्या नावीन्यपूर्ण उपक्रमाचा प्रारंभ शुक्रवारी (ता. १५) स्‍वातंत्र्यदिनी करण्यात आला.
महापालिका आयुक्त डॉ. कैलास शिंदे यांच्या मार्गदर्शनाखाली महापालिका मुख्यालयातील ध्वजारोहण करण्यात आला. त्‍यानंतर या उपक्रमाची सुरुवात झाली. अशाप्रकारे मालमत्ताधारकांना मालमत्ता ओळखपत्र उपलब्ध करून देणारी नवी मुंबई ही देशातील पहिलीच महापालिका ठरली आहे.
या मालमत्ता ओळखपत्राचा लाभ शहरातील ३.५ लाख मालमत्ताधारकांना होणार असून, त्यांना आपल्या मालमत्ता क्रमांक, पत्ता, क्षेत्रफळ, कर तपशील अशी सर्व प्रकारची माहिती एकाच ठिकाणी या कार्डद्वारे उपलब्ध होणार आहे. याप्रसंगी आयुक्त डॉ. कैलास शिंदे यांच्या हस्ते पाच मालमत्ताधारकांना प्रातिनिधिक स्वरूपात मालमत्ता ओळखपत्रे वितरित करण्यात आली. या वेळी अतिरिक्त आयुक्त सुनील पवार, अतिरिक्त आयुक्त तथा कर विभागाचे प्रमुख डॉ. राहुल गेठे, शहर अभियंता शिरीष आरदवाड आणि इतर विभागप्रमुख तसेच मालमत्ता कर विभागाच्या सहाय्यक आयुक्त अलका महापूरकर आणि इतर अधिकारी उपस्थित होते.
या कार्ड स्वरूपातील ओळखपत्राद्वारे मालमत्ताधारकांना आपल्या मालमत्ता कराची थकबाकी, आगाऊ भरलेला कर रक्कम सहजपणे पाहता येणार आहे. ओळखपत्र घेऊन मालमत्ताधारक थेट नागरी सुविधा केंद्रावर जाऊन कर भरू शकतात. या मालमत्ता ओळखपत्रावरील क्यूआर कोड स्कॅन करून ऑनलाइन कर भरण्याची सुविधा उपलब्ध आहे. तसेच आधार कार्डाप्रमाणे हे मालमत्तेचे अधिकृत ओळखपत्र म्हणूनही वापरता येईल. या मालमत्ता ओळखपत्रामुळे मालमत्तेची विक्री, हस्तांतरण इत्यादींसाठी मालमत्तेची ओळख व पडताळणी सोपी होईल. तसेच यामुळे मालमत्ताधारकांना मालमत्ता कर विभागाशी संपर्क साधताना होणाऱ्या श्रम, वेळ आणि खर्चाची बचत होणार आहे.

मालमत्ता ओळखपत्राचा उपक्रम हा मालमत्ता कर विभागातील पारदर्शकता आणि कार्यक्षमता वाढविणारा आहे. नवी मुंबई महापालिका ही मालमत्ता करधारकांना ओळखपत्र देणारी देशातील पहिली महापालिका ठरली आहे.
- डॉ. कैलास शिंदे,
आयुक्त, नवी मुंबई महापालिका