नवी मुंबईत ध्वजारोहण उत्साहात संपन्न
वाशी, ता. १५ (बातमीदार) ः स्वातंत्र्यदिनानिमित्त नवी मुंबई महापालिका मुख्यालय इमारतीच्या प्रांगणात आयुक्त डॉ.कैलास शिंदे यांच्या हस्ते शुक्रवारी (ता. १५) ध्वजारोहण झाले. यावेळी अतिरिक्त आयुक्त सुनिल पवार, अतिरिक्त आयुक्त डॉ.राहुल गेठे, शहर अभियंता शिरीष आरदवाड, प्रशासन विभागाचे उपायुक्त भागवत डोईफोडे यांच्यासह सर्व विभागप्रमुख, अधिकारी, कर्मचारीवृंद आणि नागरिक मोठ्या संख्येने उपस्थित होते.
यंदा महापालिकेस सुपर स्वच्छ लीग या विशेष श्रेणीत मानांकन प्राप्त झाले असून यामध्ये महत्वपूर्ण योगदान देणाऱ्या प्रत्येक विभागातील स्वच्छतामित्र व स्वच्छतासखींचा विशेष सन्मान करण्यात आला. मुख्यालयाच्या अंतर्गत दर्शनी भागात काढलेली घरोघरी तिरंगा घरोघरी स्वच्छता ही आकर्षक रांगोळी आणि झेंड्याच्या सेल्फी पॉईंटसोबत उपस्थित नागरिकांनी उत्साहाने छायाचित्रे काढली. याठिकाणी ठेवलेल्या तिरंगा कॅनव्हासवरही स्वाक्षरी करून नागरिकांनी अभियानात आपला सहभाग नोंदविला.
तर, मुख्यालय इमारतीला गुरुवार (ता. १४) पासूनच नयनरम्य तिरंगी विद्युत रोषणाई केली आहे. त्यामुळे मुख्यालय इमारतीच्या आकर्षणात आणखी भर पडली आहे. मुख्यालय इमारतीसमोरील २२५ फूट उंच राष्ट्रध्वज स्वातंत्र्यदिनाचे औचित्य साधून घरोघरी तिरंगा मोहिमेच्या अनुषंगाने फडकविण्यात आला. याच वेळी विभाग कार्यालयामध्ये देखील विभाग अधिकारी यांच्यामार्फत ध्वजारोहण करण्यात आले.