पं. चक्रवर्तींकडून विनामूल्य नवोदितांना प्रशिक्षण
मुंबई, ता. १७ : श्रुतीनंदन प्रशिक्षण वर्गाअंतर्गत पद्मभूषण पं. अजय चक्रवर्ती यांच्या मार्गदर्शनाखाली राज्यातील निवडक विद्यार्थ्यांना विनामूल्य कंठसंगीत प्रशिक्षण मिळणार आहे. या उपक्रमाला टाटा समूहाचे सहकार्य लाभले आहे. या प्रशिक्षणामध्ये स्वर, लय, ताल, आवाजाची देखभाल आणि सादरीकरणाचे तंत्र या विषयांवर मार्गदर्शन केले जाणार आहे. पं. चक्रवर्ती यांच्यासोबतच पुण्याचे मेहेर परळीकर आणि आयेशा मुखर्जी हे कनिष्ठ गुरू म्हणून सहभाग घेणार आहेत. निवडक विद्यार्थ्यांना शिष्यवृत्ती मिळण्याची संधीही उपलब्ध असेल. प्रशिक्षणासाठी आठ ते १४ आणि १५ ते २० या वयोगटातील विद्यार्थ्यांची निवड केली जाणार आहे. प्राथमिक निवड झालेल्या विद्यार्थ्यांची प्रत्यक्ष ऑडिशन मुंबईतील नॅशनल सेंटर फॉर परफॉर्मिंग आर्ट येथे होणार आहे. अंतिम निवडीनंतर विद्यार्थ्यांना दर महिन्यातील तीन ते चार दिवस मुंबई, पुणे आणि इतर ठिकाणी प्रशिक्षण दिले जाणार असल्याचे सांगितले.