श्रीवर्धन येथे कृष्णाष्टमीला पारंपरिक खेळांचा उत्साह
लक्ष्मीनारायण मंदिर परिसरात कीर्तन, अभंग व धार्मिक कार्यक्रमांना प्रतिसाद
श्रीवर्धन, ता. १६ (वार्ताहर) : श्रीवर्धन शहरातील पेशवेकालीन श्री लक्ष्मीनारायण मंदिरात यंदाही कृष्णाष्टमीनिमित्त भव्य आणि पारंपरिक पद्धतीने कार्यक्रमांचे आयोजन करण्यात आले. ब्राह्मण व प्रभू समाजाच्या वतीने आयोजित या धार्मिक सोहळ्यात सुश्राव्य कीर्तन, संतांच्या अभंगांची गाणी तसेच पुरुषांनी खेळलेले पारंपरिक खेळ यामुळे मंदिर परिसर उत्साहाने आणि भक्तिभावाने निनादून गेला.
या कार्यक्रमाचा मुख्य आकर्षण म्हणजे काल्याचे कीर्तन. चिपळूण येथील कीर्तनकार महेश काणे यांनी शुक्रवार (ता. १५) ते रविवार (ता. १७) या तीन दिवसांत विविध धार्मिक कीर्तनांची मैफल सादर केली. श्रीकृष्ण जन्मकथा, काल्याचे कीर्तन, संतवाणीतील अभंग आणि त्यासोबतच भक्तिभावाने रंगलेले पारंपरिक खेळ हे सर्व कार्यक्रम भक्तांसाठी विशेष ठरले.
काल्याचे कीर्तन संपल्यानंतर पुरुष मंडळींनी जय ‘कृष्ण कृष्ण’च्या गजरात पारंपरिक खेळ खेळले. संत तुकाराम, संत एकनाथ आणि संत जनाबाई यांच्या अभंगांवर आधारित हे खेळ सादर झाले. पेटी, नाल, टाळांच्या ठेक्यावर अंगात जोश आणणारे हमामा, हुंबरी, दळण-कांडण, फुगडी दंड, बस फुगडी असे अनेक खेळ रंगले. हे खेळ केवळ मनोरंजनापुरते मर्यादित न राहता श्रद्धा, एकोप्याचे आणि सामूहिकतेचे दर्शन घडवणारे ठरले.
कार्यक्रमाच्या शेवटी भक्तांसाठी महाप्रसादाचे आयोजन करण्यात आले होते. तसेच लळीत कीर्तनाने भक्तिमय वातावरण अधिक रंगतदार झाले. श्री लक्ष्मीनारायण देवस्थान ट्रस्टने या उत्सवाचे नियोजन केले होते. स्थानिक नागरिकांसह बाहेरील भक्तांनीही मोठ्या संख्येने उपस्थित राहून या धार्मिक आणि सांस्कृतिक सोहळ्याचा आस्वाद घेतला.