अदाणी छोडो, धारावी बचाव आंदोलन
तिरंगा यात्रेतून इशारा
धारावी, ता. १६ (बातमीदार) : धारावीतील सव्वा लाख झोपडपट्टीवासीय, दुकानदार, व्यावसायिकांचे धारावीतच पुनर्वसन करा, यासह विविध मागण्यांसाठी धारावी बचाव संघटनेतर्फे शुक्रवारी (ता. १५) धारावी जोडो तिरंगा यात्रा काढण्यात आली. स्थानिकांना धारावीबाहेर फेकण्याचे कारस्थान तयार झाले आहे, असा आरोपही संघटनेने केला आहे.
आम्ही सर्व धारावीकर एक आहोत, हा एकतेचा संदेश या तिरंगा यात्रेतून देण्यात आला, असे संघटनेचे नेते माजी आमदार बाबुराव माने यांनी सांगितले. धारावी जोडो तिरंगा यात्रेला कुंभारवाडा नाका, हाॅटेल बिस्मिल्ला येथून सुरुवात झाली. धारावीकरांची एकच आस धारावीतच पुनर्विकास, असे संदेश लिहिलेले फलक आणि तिरंगे झेंडे हाती घेत ही यात्रा निघाली होती. भारत माता की जय, जिंदाबाद जिंदाबाद धारावी बचाव आंदोलन जिंदाबाद अशा घोषणा यात्रेत देण्यात आल्या. या यात्रेत ठाकरे पक्षाचे नेते बाबुराव माने, शेकाप नेते राजेंद्र कोरडे, अनिल कासारे, मंजू वीर, एकता असोसिएशनच्या इशरत खान, सपाचे रहिम मोटारवाला, समाजसेवक आझम जाला, कुसुम गौड, कॉम्रेड नसीरुल हक, शेकाप विद्यार्थी संघटनेच्या सौम्या कोरडे, आम आदमी पक्षाचे राफेल पाॅल, गौतमी जाधव, कृष्णा गायकवाड, संतोष तांबे आणि बसपाचे संजीवन जैस्वाल यांच्यासह असंख्य धारावीकर सहभागी झाले होते.
दीड हजार एकर जमीन अदाणीस कशाला?
ब्रिटिश राजवट ही अन्याय करणारी होती. म्हणूनच महात्मा गांधींना छोडो भारतचा नारा द्यावा लागला. आता अदाणी कंपनीस छोडो धारावी हा इशारा देण्यासाठी तिरंगा यात्रा काढण्यात आली, असे संघटनेचे नेते बाबुराव माने यांनी सांगितले. ६०० एकर जमिनीवर सर्व धारावीकरांना ५०० चौरस फुटांचे घर मिळत असतानाही सरकार अदाणी कंपनीला दीड हजार एकर जमीन का देत आहे, असा सवाल बाबुराव माने यांनी या वेळी केला. राजेंद्र कोरडे म्हणाले, की कुंभारवाड्यासाठी सरकारने मास्टर प्लॅन तयार करावा तसेच कोळीवाड्यांचे सीमांकन करण्यात यावे.
फोटो ओळ
धारावी बचाव आंदोलन संघटनेने तिरंगा यात्रा काढली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.