उत्साहाला कोंडीचे ग्रहण
ठाणेकरांना फटका
सकाळ वृत्तसेवा
ठाणे, ता. १६ : शहरासह जिल्ह्यात दहीहंडी उत्सवाचा जोरदार उत्साह असताना, नोकरी-धंद्यासाठी बाहेर पडलेल्या ठाणेकरांना वाहतूक कोंडीचा सामना करावा लागला. रस्त्यांमध्ये उभारलेल्या दहीहंडी मंडपांमुळे अनेक मार्ग वाहतूक पोलिसांनी बंद केले; पण ठाणे स्थानकापासून शहरातील अंतर्गत रस्त्यांवर कोंडीची अवस्था झाली. गोविंदा पथकांनी रस्त्याच्या दोन्ही बाजूला वाहने पार्क केल्याने कोंडीत आणखी भर पडली. ठाणे, कल्याण, डोंबिवली आणि इतर शहरांमध्ये लाखो रुपयांच्या बक्षिसांसाठी मोठ्या प्रमाणावर दहीहंडी आयोजित करण्यात आल्या. यंदा बाईक आणि स्कूटीवरून येणाऱ्या गोविंदांची संख्या विशेष वाढल्याचे दिसले.

ठाणे शहरासह जिल्ह्यामध्ये सर्वत्र दहीहंडीता उत्साह शिगेला पोहोचला असताना नोकरी-धंद्यासाठी घराबाहेर पडलेल्या ठाणेकरांना ठिकठिकाणी वाहतूक कोंडीचा सामना करावा लागला. शहरातील बहुतेक रस्त्यांमध्ये दहीहंडीसाठी मंडप उभारल्यामुळे आणि आधीच वाहतूक पोलिसांनी अनेक रस्ते बंद करून पर्यायी मार्ग सुचवल्यामुळे ठाणे स्थानकापासून ते शहरातील अंतर्गत रस्त्यांवर ठिकठिकाणी कोंडी झाल्याचे चित्र पाहायला मिळाले. त्यात येणाऱ्या गोविंदा पथकांनी रस्त्याच्या दुतर्फा पार्किंग केल्याने कोंडीत भर पडली.

दरवर्षीप्रमाणे ठाण्यासह कल्याण, डोंबिवली आणि इतर सर्वच प्रमुख शहरांमध्ये दहीहंडीचे आयोजन मोठ्या प्रमाणात करण्यात आले होते. लाखो रुपयांची बक्षिसे जाहीर झाल्यामुळे सकाळपासूनच मुंबईतील दहिसर, कांदिवली, जोगेश्वरी तसेच जिल्ह्यातील शहरामधून गोविंदांची पथके दाखल होऊ लागली. दरवर्षीप्रमाणे या वेळी ट्रक भरून गोविंदा पथके दाखल होत होती. यंदा बाईक, स्कूटीवरून येणाऱ्या गोविंदांची संख्या सर्वाधिक पाहायला मिळाली. शहरात येणारे गोविंदा पथक सर्वप्रथम टेंभीनाक्यावर जाऊन मानाच्या दहीहंडीला सलामी देत होते. त्यामुळे तीन हात नाका ते टेंभीनाक्यापर्यंतच्या मार्गावर गोविंदा पथकांची गर्दी पाहायला मिळाली.

टेंभीनाक्याकडे जाणाऱ्या मार्गावर त्यामुळे वाहतूक कोंडी झाली होती. दुसरीकडे मनसेचे अविनाश जाधव यांनी नौपाडा भागात दहीहंडीचे आयोजन केल्यामुळे हाकेच्या अंतरावर असलेले ठाणे स्थानक गाठताना ठाणेकरांचा खोळंबा झालेला पाहायला मिळाला. हरिनिवास सर्कल, गोखले रोड यासारख्या अरुंद मार्गांवर गोविंदा पथकांनी दुतर्फा वाहने पार्क केल्यामुळे कोंडीत भर पडली. सायंकाळपर्यंत ही परिस्थिती कायम होती. दरम्यान, कोंडी सोडवण्यासाठी अनेक ठिकाणी वाहतूक पोलिस प्रयत्न करीत असल्याचेही पाहायला मिळाले.