जनतेने फोडली विरोधकांच्या विरोधाची हंडी
उपमुख्यमंत्री एकनाथ शिंदे यांची विरोधकांवर टीका
सकाळ वृत्तसेवा
ठाणे, ता. १६ : गेल्या तीन वर्षांपूर्वी आम्ही विकासाचे थर रचून विकासाची हंडी फोडली, तर विरोधकांनी विकासविरोधी हंडी उभी केली होती. मात्र जनतेने ती हंडी फोडून विरोधकांना घरी बसवले, अशी टीका उपमुख्यमंत्री एकनाथ शिंदे यांनी केली. तसेच यंदाच्या विधानसभा निवडणुकीत २३२ थर रचत विधानसभेची हंडी महायुतीनेच फोडल्याचेदेखील त्यांनी सांगितले.
ठाण्यातील टेंभीनाका येथे शिवसेनेचे दिवंगत ठाणे जिल्हाप्रमुख आनंद दिघे यांनी टेंभीनाका मित्रमंडळाच्या माध्यमातून सुरू केलेल्या दहीहंडी उत्सवात उपमुख्यमंत्री एकनाथ शिंदे यांनी शनिवारी सकाळी उपस्थिती लावत गोविंदा पथकांशी संवाद साधला. या वेळी त्यांनी विरोधकांवर टीका केली.
मुख्यमंत्री व्हायच्या आधी कोरोनाच्या नावाखाली दहीहंडी, गणेशोत्सव अशा उत्सवांवर बंदी घालण्यात आली होती; मात्र मी मुख्यमंत्री होताच सण-उत्सावांवरील बंदी उठवत पहिला गोविंदा उत्सव मोठ्या उत्साहात व जल्लोषात सुरू केला. त्यानंतर गणेशोत्सव, नवरात्रौत्सव, दसरा आणि दिवाळी या सणांवरील बंदी हटवून ते साजरे करण्यास सुरुवात केली. गेल्यावर्षी दहीहंडी उत्सवात सांगितले होते, की महायुतीच विधानसभेची हंडी फोडणार आहे. त्यानुसार महायुतीनेच ही हंडी २३२ थर लावून फोडली. अशाच विकासाच्या हंड्या आपल्याला फोडून महाराष्ट्राला पुढे न्यायचे आहे, असे शिंदे म्हणाले. या ठाण्यासह महाराष्ट्राचा विकास करायचा असल्याचे सांगत पाकिस्तानची हंडी पंतप्रधान नरेंद्र मोदी यांनी फोडली असल्याचेदेखील शिंदे यांनी या वेळी सांगितले.

ठाणे ही गोविंदांची पंढरी
धर्मवीर आनंद दिघे यांनी टेंभीनाक्यावर दहीहंडी उत्सव सुरू केला आणि तो संपूर्ण ठाणे, मुंबई आणि महाराष्ट्रात सगळीकडे मोठ्या उत्साहात साजरा होऊ लागला. हा उत्सव आता सातासमुद्रापार गेला आहे. यापूर्वी दहीहंडी बघण्यासाठी स्पेनवरून इकडे लोक यायचे. आता स्पेनची लोकं इथे येऊन गोविंदांसारखे थर लावतात. झेंडावंदनाच्या दिवशी शिवसेना शाखेजवळ त्यांनी असेच थर लावले. त्यामुळे ठाणे ही गोविंदांची पंढरी झाली असल्याचे उपमुख्यमंत्री शिंदे यांनी या वेळी सांगितले.