चौक गाव चोरट्यांच्या रडारवर
खालापूर, ता. १७ (बातमीदार) : तालुक्यातील चौक पोलिस दूरक्षेत्र हद्दीतील घरफोडींचे सत्र सुरू असून गेल्या चार दिवसांत दुसऱ्या घरफोडीने नागरिकांमध्ये भीतीचे वातावरण निर्माण झाले आहे. रविवारी (ता. १०) सरकारी रुग्णालयाच्या कर्मचारी निवासस्थानात चोरी झाली होती. या वेळी रॉड हातात घेऊन आलेल्या चोरट्यांची टोळी सीसीटीव्हीमध्ये दिसून आली होती. ही घटना ताजी असतानाच गुरुवारी (ता. १४) रात्री ११ वाजता चौक बाजारपेठेतील महावीर टिंबर्सजवळील गोडाऊन येथे घरफोडीची घटना घडली. चोरट्यांनी बाथरूमची लोखंडी खिडकी उचकटून घरात प्रवेश केला. घराच्या पाठीमागील दरवाजा तोडून बेडरूममधील कपाटातून ३७ हजार रुपयांच्या चांदीचा कळस आणि नारळ यांसह ऐवज चोरले. याप्रकरणी खालापूर पोलिस ठाण्यात गुन्हा नोंदविण्यात आला असून पोलिस उपनिरीक्षक विशाल पवार अधिक तपास करीत आहेत.