एमआयटी विश्वशांती गुरुकुलमध्ये स्वातंत्र्यदिन उत्साहात
नवी मुंबई, ता. १६ : देशभक्ती, सामाजिक बांधिलकी आणि उत्साहाच्या वातावरणात उळवे, नवी मुंबई येथील एमआयटी विश्वशांती गुरुकुलमध्ये स्वातंत्र्यदिन शुक्रवारी (ता. १५) साजरा करण्यात आला. यावेळी निवृत्त कर्नल सुरेंद्रनाथ यांच्या हस्ते ध्वजारोहण झाले. यावेळी स्वातंत्र्यसैनिकांच्या बलिदानाची आठवण करून देत विद्यार्थ्यांना जबाबदार नागरिक बनण्याचे आवाहन केले.
या वर्षीचा उत्सव हमारा देश, हमारी शान या प्रेरणादायी संकल्पनेवर आधारित होता, यात देशाचा गौरव करतानाच समाजातील प्रत्येक घटकाचा सन्मान करण्यात आला. कनेक्टिंग हार्ट्स उपक्रमांतर्गत दिव्यांग विद्यार्थ्यांनी आपले विशेष कौशल्य सादर करून उपस्थितांची मने जिंकली. त्यांच्या प्रतिभेचा सन्मान करत, शाळेच्या मुख्याध्यापिकांनी त्यांचा सन्मानचिन्ह देऊन गौरव केले. यानिमित्त आयोजित कार्यक्रमामध्ये शाळेतील विद्यार्थ्यांनी देशभक्तीपर गीते, नृत्य आणि नाटिका सादर करून परंपरा आणि लोकशाही मूल्यांचे दर्शन घडवले. ड्रीम बलून परेड, वेशभूषा स्पर्धेत विद्यार्थ्यांनी राष्ट्रीय नेत्यांची वेशभूषा साकारून सर्वांना प्रेरित केले.