सकाळ वृत्तसेवा
ठाणे, ता. १६ : ‘गोविंदा रे गोपाळा’च्या जयजयकारात आणि ढोल-ताशांच्या गजरात ठाणे जिल्ह्यात दहीहंडी उत्सव रंगला. पावसाच्या साक्षीने गोविंदांनी मानवी मनोरे रचले. ठाणेतील टेंभी नाका आणि शहरात या उत्सवाचा जल्लोष पाहायला मिळाला. या उत्सवाला कॉर्पोरेट करण्यात राजकीय पक्षांनी हातभार लावला. मोठमोठे मंडप, उंच हंड्या, डीजे, ढोलताशे, मराठी-हिंदी नाट्य आणि चित्रपट कलाकारांनी कार्यक्रम सजवला.
गोविंदांच्या सुरक्षेसाठीही पोलिसांचा कडक बंदोबस्त होता, त्यामुळे उत्सव शांततेत पार पडला. यावर्षी बक्षीसांची रक्कमही मोठ्या प्रमाणावर वाढवण्यात आली. विशेष म्हणजे विश्वविक्रम करणाऱ्या पथकाला २५ लाखांपेक्षा जास्त बक्षीस जाहीर करण्यात आले. सकाळपासून मुंबईसह परिसरातील लाखो गोविंदा पथक ठाण्याकडे दाखल होऊ लागले. दुचाकी, चारचाकी, ट्रकने प्रवास करत गोविंदांनी शहरात जल्लोष केला. महिला गोविंदा पथकांनाही मोठा प्रतिसाद मिळाला. रिपरिप पावसामुळे मनोरे रचताना थोड्या अडचणी आल्या. काही ठिकाणी आयोजकांनी गोविंदांच्या ‘पोटापाण्याची’ काळजी घेतली. काही ठिकाणी गोविंदांनी वडापाववर जोरदार ताव मारला.