रानवली ग्रामपंचायत येथे ध्वजारोहण संपन्न
श्रीवर्धन, ता. १६ (वार्ताहर) ः रानवली येथे स्वातंत्र्य दिनानिमित्त शुक्रवारी (ता. १५) ध्वजारोहण जिल्हा परिषद शाळेत मुख्याध्यापिका अनुजा भुसाणे यांच्या हस्ते करण्यात आले. यावेळी राष्ट्रगीत, राज्यगीत व ध्वजगीत गायन करण्यात आले. यावेळी मोठ्या संख्येने ग्रामस्थ व पालक उपस्थित होते. त्याचप्रमाणे तलाव परिसर, पशुवैद्यकीय दवाखाना, उर्दू शाळा रानवली, उंड्रे हायस्कूल, अंजुमन हायस्कूल, पोस्ट कार्यालय या ठिकाणी ध्वजारोहण झाले.
ध्वजारोहणाचा मुख्य कार्यक्रम ग्रामपंचायत कार्यालय येथे सुमारे १५० ग्रामस्थांच्या उपस्थितीत झाला. या कार्यक्रमाचे ध्वजारोहण ज्येष्ठ सामाजिक कार्यकर्ते विठोबा हावरे यांच्या हस्ते पार पडले. यावेळी गावातील ज्येष्ठ नागरिक व सर्व समाजातील अध्यक्षांचा गुलाब पुष्प देऊन सन्मान करण्यात आला.
यावेळी तंटामुक्ती गाव अध्यक्ष म्हणून आयुब खान पठाण यांची निवड करण्यात आली. या कार्यक्रमाला सरपंच सुरेश मांडवकर, उपसरपंच अत्ताउल्ला जालगावकर, ग्रामपंचायत सदस्य, समाजसेवक राजू जाधव आणि समाज अध्यक्ष, ग्रामस्थ व महिला मंडळ, शिक्षकवृंद उपस्थित होते.