कष्टकऱ्यांच्या प्रश्नाला न्याय मिळावयास हवा ः अहिर
शिवडी, ता. १६ (बातमीदार) ः स्वातंत्र्य लढ्याच्या होमकुंडात वीरपुरुषांनी प्राणार्पण करून देशाला स्वातंत्र्य मिळून दिले, त्यांच्या त्यागापासून प्रेरणा मिळत गेली आहे. या त्यागाचे खऱ्या अर्थाने मोल करायचे असेल तर गरीब, कष्टकऱ्यांच्या प्रश्नाला न्याय मिळावयास हवा, असे प्रतिपादन राष्ट्रीय मिल मजदूर‌ संघाचे अध्यक्ष आमदार सचिन आहिर यांनी केले. राष्ट्रीय मिल मजूर संघाच्या वतीने परेल येथील कार्यालयासमो‌रील प्रांगणात सचिन अहिर यांच्या हस्ते ध्वजारोहण पार पडले.
भाषावादाचा प्रश्न असेल, कबुतरांचा किंवा हत्तीचा प्रश्न असेल कामगारांच्या मूलभूत हक्कावर गदा आणण्याचा प्रयत्न झाला तर संघटित शक्ती कदापि गप्प बसणार नाही, असेही सचिन अहिर म्हणाले असून स्वातंत्र्य दिनाच्या स्फूर्तीना उजाळा देत सूई बनविण्यापासून चंद्रावर पाऊल ठेवेपर्यंत देशाने क्रांतीकारक प्रगती केली आहे, त्यामध्ये पंडित जवाहरलाल नेहरू‌पासून ते अगदी इंदिरा गांधी, राजीव गांधी, अटल बिहारी वाजपेयी अशा अनेक पंतप्रधानी दिलेल्या योगदानाचा आवर्जून उल्लेख करावा लागेल.
आज अवघ्या चार टक्के संघटित कामगारांना सामाजिक सोयी सवलतींचा लाभ मिळत असला तरी जवळपास ९६ टक्के कामगार आजही न्याय हक्कापासून वंचित आहेत. कामगार संघटनांनी लढ्यातून मिळवलेले २७ कामगार कायदे‌ केंद्र सरकारने रद्द करून, कामगार चळवळीच्या मूळावर घाव घालणाऱ्या चार कामगार संहिता संमत केल्या आहेत. त्या‌विरुध्द सर्व केंद्रीय कामगार संघटनांना अहर्निश लढावे लागत आहे, अशी खंत अहिर यांनी व्यक्त केली. यावेळी सरचिटणीस गोविंदराव मोहिते, निवृत्ती देसाई, अण्णा शिर्सेकर बजरंग चव्हाण, सुनिल बोरकर शिवाजी काळे, साई निकम, किशोर रहाटे, गिरणी कामगार वारस संघर्ष समितीचे आनंद मोरे आदी मान्यवर उपस्थित होते. ध्वज संचलनात जी.डी.आंबेकर कॅटरिंग कॉलेजचे विद्यार्थी, सेवादल विभागानेही सहभाग घेतला.