विशेष काळजीयोग्य कचरा संकलनासाठी
पालिका करणार उद्या पिवळ्या कचरापेट्यांचे वितरण
सकाळ वृत्तसेवा
मुंबई, ता. १७ - ‘घरगुती सॅनिटरी आणि विशेष काळजीयोग्य कचऱ्यांचे संकलन’ सेवा मुंबई महापालिकेने कार्यान्वित केली असून, ही सेवा आता मोठ्या प्रमाणात कचरा निर्माण करणाऱ्या आस्थापनांसाठी अनिवार्य करण्यात आली आहे. या कचऱ्याच्या संकलनासाठी ‘पिवळ्या कचरापेटी’ तयार केल्या असून, त्या पेट्यांचे वितरण घनकचरा व्यवस्थापन विभागाकडून येत्या सोमवारी (ता १८) करण्यात येणार असल्याचे पालिकेच्या सूत्रांनी सांगितले.

मुंबईतील विविध आस्थापनांनी या सेवेसाठी नोंदणी करून त्यांच्याकडील घरगुती सॅनिटरी आणि विशेष काळजीयोग्य कचऱ्याचे वर्गीकरण करून ते महानगरपालिकेकडे सुपूर्द करण्याचे आवाहन पालिकेचे उपायुक्त (घनकचरा व्यवस्थापन) किरण दिघावकर यांनी केले आहे.  

‘घरगुती सॅनिटरी आणि विशेष काळजीयोग्य कचऱ्यांत प्रामुख्याने वापरलेले सॅनिटरी नॅपकिन्स, डायपर्स, टॅम्पॉन्स, निरोध आणि इतर स्वच्छतासंबंधित बाबींचा तसेच शरीर पुसण्यासाठी वापरलेले विविध द्रवांनी दूषित कापूस, बँडेजेस (जसे की लघवी, रक्त, लाळ, पू, विष्ठा, नखांनी दूषित झालेले), कालबाह्य औषधी (इंजेक्शन, सुई, रेझर ब्लेड्स) आणि ब्यूटी पार्लर, निर्माण होणारा कचरा (वॅक्सिंग स्ट्रिप्स, पीपीई) आदींचा समावेश असतो. हा अत्यंत घातक प्रकारचा कचरा असला तरी बरेचदा त्याकडे दुर्लक्ष केले जाते आणि सामान्य घरगुती कचऱ्यामध्येच ते टाकले जाते. या सेवेचा लाभ घेण्यासाठी आजवर तीन हजार ५३६ आस्थापनांनी नोंदणी केल्याची माहिती उपायुक्त दिघावकर यांनी दिली.
़़़़़़़़़़़़़़
नोंदणीकृत आस्थापना
मुंबई शहर आणि उपनगरातील दोन हजार ९१ गृहनिर्माण संस्था, एक हजार १४६ श्रृंगार केंद्र, २८६ शैक्षणिक संस्था, ४० महिला वसतिगृह आदींचा समावेश आहे.
------------