विक्रोळीत दरड कोसळून दोघांचा मृत्यू

घाटकोपर, ता. १६ (बातमीदार) ः जोरदार पावसामुळे विक्रोळी पार्कसाईट येथील वर्षानगर भागात दरड कोसळल्याची घटना शुक्रवारी (ता. १५) मध्यरात्री घडली.
वर्षानगरमधील डोंगराळ झोपडपट्टीत असलेल्या जनकल्याण सोसायटीवर दरड कोसळली आणि तिचा मलबा थेट एका घरावर जाऊन पडला. या दुर्घटनेत मिश्रा कुटुंबातील शालू मिश्रा (वय १९) आणि सुरेश मिश्रा (५०) यांचा जागीच मृत्यू झाला. आरती मिश्रा (४५) आणि ऋतुराज मिश्रा (२०) हे गंभीर जखमी झाले असून त्यांच्यावर राजावाडी रुग्णालयात उपचार सुरू आहेत. वर्षानगरमधील हा डोंगराळ परिसर घनदाट लोकवस्तीने भरलेला आहे आणि अशा घटना या भागात वारंवार घडत असतात. सतत होणाऱ्या अपघातांमुळे स्थानिक नागरिकांमध्ये भीतीचे वातावरण निर्माण झाले आहे. या अपघातानंतर महापालिका प्रशासन व आपत्कालीन बचाव पथकाने घटनास्थळी धाव घेतली आणि मलबा हटवून परिसरातील इतर घरे तातडीने रिकामी करण्यात आली आहेत.