राष्ट्रभक्तीने भारलेल्या सायकल रॅलीतून ‘घरोघरी तिरंगा’ अभियानाचा जागर
नेरूळ, ता. १६(बातमीदार) ः नवी मुंबई महापालिकेच्या वतीने घरोघरी तिरंगा-घरोघरी स्वच्छता अभियानात विविध उपक्रम राबविण्यात येत असून शुक्रवारी (ता. १५) स्वातंत्र्यदिनानिमित्त तिरंगा सायकल रॅलीचे आयोजन करण्यात आले होते. महापालिका मुख्यालयात आयुक्त डॉ.कैलास शिंदे यांनी झेंडा दाखविल्यानंतर तिरंगा सायकल रॅलीस प्रारंभ झाला. यावेळी अतिरिक्त आयुक्त सुनिल पवार व डॉ. राहुल गेठे, प्रशासन विभागाचे उपायुक्त भागवत डोईफोडे, शहर अभियंता शिरीष आरदवाड, मुख्य लेखा व वित्त अधिकारी सत्यवान उबाळे, घनकचरा व्यवस्थापन विभागाचे उपायुक्त डॉ. अजय गडदे व स्मिता काळे, अतिरिक्त शहर अभियंता अरविंद शिंदे आणि इतर विभागप्रमुख व अधिकारी उपस्थित होते.
सायकल हे प्रदूषण विरहित वाहन असून सायकल रॅलीव्दारे भारत माता की जय अशा घोषणा देत राष्ट्रप्रेमाचे महती दर्शविण्यात आली. आणि पर्यावरणाचे महत्वही अधोरेखित करण्यात आले. ७० हून अधिक सायकलपटूंनी या तिरंगा रॅलीमध्ये उत्साहाने सहभागी होत सीवूड ग्रँड सेंट्रल नेक्सस मॉलपर्यंत देशप्रेम व स्वच्छताविषयक जनजागृती केली.