पनवेलमध्ये स्वातंत्र्यसैनिकांच्या वारसांकडून ध्वजवंदन
हुतात्मा स्मारक उद्यानात स्वातंत्र्य दिनानिमित्त गौरवशाली ध्वजारोहण
पनवेल, ता. १६ (बातमीदार) ः शहरातील हुतात्मा स्मारक उद्यानात स्वातंत्र्यदिनानिमित्त शुक्रवारी (ता. १६) ध्वजारोहण सोहळा पार पडला. यावेळी स्वातंत्र्यसैनिक बबन धरणे यांच्या पत्नी व त्यांच्या कुटुंबाचे प्रतिनिधित्व करणाऱ्या ताराबाई धरणे यांच्या हस्ते ध्वजवंदन केले. यावेळी आमदार प्रशांत ठाकूर यांनी भाषणात सांगितले की, स्वातंत्र्यसैनिकांच्या वारसांच्या हस्ते ध्वजारोहण करून त्यांचा सन्मान राखण्याचा प्रयत्न केला जात आहे. तर, देशप्रेम ही केवळ भावना नसून, ती कृतीतून व्यक्त केली पाहिजे, असे प्रतिपादन आमदार विक्रांत पाटील यांनी केले. या सोहळ्यात पनवेल महानगरपालिकेच्या अग्निशमन व सुरक्षा विभाग आणि पोलिस दलाकडून ध्वजाला मानवंदना देण्यात आली.
या कार्यक्रमाला तहसीलदार विजय पाटील, विरोधी पक्षनेते प्रितम म्हात्रे, अतिरिक्त आयुक्त गणेश शेटे, परिवहन व्यवस्थापक कैलास गावडे, माजी सभागृह नेते परेश ठाकूर,उपायुक्त डॉ. वैभव विधाते, प्रसेनजित कारलेकर, रविकिरण घोडके, मंगला माळवे, स्वरूप खारगे, सहायक आयुक्त सुबोध ठाणेकर, मुख्य वैद्यकीय अधिकारी डॉ. आनंद गोसावी माजी नगरसेविका यांच्यासह महापालिकेचे अधिकारी, कर्मचारी, स्वातंत्र्यसैनिकांचे कुटुंबीय आणि मोठ्या संख्येने पनवेलकर नागरिक उपस्थित होते.