मुंब्र्यात आग; गृहोपयोगी साहित्य खाक
कळवा, ता. १७ (बातमीदार) : मुंब्र्यातील ठाकूर पाडा परिसरात आनंदनगर सोसायटीतील एका बंद घराला आग लागून गृहोपयोगी वस्तू व विजेवरील चालणाऱ्या वस्तू जळून खाक झाल्याची घटना शुक्रवारी (ता. १५) रात्री साडेदहाच्या सुमारास घडली. आनंद सोसायटीतील खोली क्रमांक १६ मध्ये राहणारे संदीप निकम हे आपल्या कुटुंबासह बाहेरगावी गेल्याने त्यांच्या बंद असलेल्या खोलीमध्ये शुक्रवारी रात्री अचानक आग लागल्याने ही घटना घडली. आगीचे वृत्त कळताच मुंब्रा अग्निशमन दलाच्या जवानांनी घटनास्थळी धाव घेत आगीवर नियंत्रण मिळवले.