रोहा शहरात मंगळवारी पाणीपुरवठा बंद
देखभाल दुरुस्तीमुळे नगरपालिकेची सूचना
रोहा, ता. १७ (बातमीदार) : रोहा-अष्टमी नगरपालिकेच्या पाणीपुरवठा विभागातर्फे जलवाहिनी व यंत्रणेच्या देखभाल-दुरुस्तीचे काम हाती घेतले जात आहे. यामुळे येत्या मंगळवारी (ता. १९) रोहा-अष्टमी शहरातील संपूर्ण पाणीपुरवठा एक दिवसासाठी बंद राहणार आहे. ही माहिती नगरपालिकेचे मुख्याधिकारी अजयकुमार एडके यांनी दिली.

रोहा शहराला डोलवहाल पाणीपुरवठा योजनेअंतर्गत पाणीपुरवठा केला जातो. ही योजना १९९५ मध्ये तत्कालीन आमदार सुनील तटकरे यांच्या प्रयत्नातून सुरू करण्यात आली होती. गेल्या ३० वर्षांपासून या योजनेच्या देखभाल व दुरुस्तीच्या कामांवर कोट्यवधी रुपये खर्च करण्यात आले आहेत. या योजनेचा कालावधी आणि वाढती दैनंदिन गरज लक्षात घेता, यंत्रणा वेळोवेळी दुरुस्तीची मागणी करते. या पार्श्वभूमीवर नगरपालिकेने १९ ऑगस्ट रोजी ‘शट डाऊन’ घेऊन सर्व आवश्यक देखभाल व दुरुस्तीची कामे पूर्ण करण्याचा निर्णय घेतला आहे. मुख्याधिकारी अजयकुमार एडके यांनी नागरिकांना उपलब्ध पाण्याचा काटकसरीने वापर करण्याचे आवाहन केले असून, नगरपालिकेला सहकार्य करण्याचेही आवाहन केले आहे.