१० वर्षांपासून पोल्ट्री शेडमध्ये शिक्षण
मढ आश्रमशाळेच्या विद्यार्थ्यांचे स्थलांतर रखडले

टोकावडे, ता. १७ (बातमीदार) : मुरबाड तालुक्यातील शासकीय माध्यमिक आश्रमशाळा, मढ येथील आदिवासी विद्यार्थ्यांचे शिक्षण गेल्या १० वर्षांपासून भाड्याच्या पोल्ट्री शेडमध्ये सुरू आहे. शासनाने नवीन शाळा इमारत बांधून डिसेंबर २०२४ मध्ये प्रकल्प अधिकाऱ्यांच्या ताब्यात दिली असूनही अद्याप त्या इमारतीत शाळेचे स्थलांतर झालेले नाही. त्यामुळे विद्यार्थ्यांचे शिक्षण, आरोग्य आणि भविष्य संकटात आले आहे.

मुरबाड तालुक्यातील शासकीय माध्यमिक आश्रमशाळा मढ येथील आदिवासी विद्यार्थी गेली १० वर्षे भाड्याच्या पोल्ट्री शेडमध्ये शिक्षण घेत आहेत. अपूर्ण वर्गखोल्या, छताची गळती, खड्डेमय जमीन आणि मूलभूत सुविधांच्या अभावामुळे विद्यार्थ्यांचे शिक्षण व आरोग्य धोक्यात आले आहे. नवीन इमारत डिसेंबर २०२४ मध्ये प्रकल्प अधिकाऱ्यांच्या ताब्यात देण्यात आली असली तरी अद्याप शाळेचे नवीन इमारतीमध्ये स्थलांतर झालेले नाही.

१३ जून २०२५ रोजी दैनिक सकाळने ‘पोल्ट्री शेडमध्ये अभ्यासाचे धडे’ या मथळ्याखाली या गंभीर प्रकाराची दखल घेतली होती. त्यानंतर शहापूर एकात्मिक आदिवासी विकास प्रकल्प अधिकारी राजेंद्रकुमार हिवाळे यांनी १५ ऑगस्टपूर्वी नवीन इमारतीत स्थलांतराचे लेखी आदेश दिले होते, मात्र स्वातंत्र्यदिन उलटूनही विद्यार्थ्यांना मूळ शेडमध्येच ठेवण्यात आले आहे. शहापूर एकात्मिक आदिवासी विकास प्रकल्प अधिकारी राजेंद्रकुमार हिवाळे यांनी १५ ऑगस्टपर्यंत स्थलांतर करण्याचे आदेश मुख्याध्यापकांना दिले होते; मात्र स्वातंत्र्यदिन उलटूनही शाळा नवीन इमारतीत स्थलांतरित केली नाही. यासंदर्भात विद्यार्थ्यांनीही प्रकल्प अधिकाऱ्यांकडे निवेदन सादर करत स्वातंत्र्य मिळूनही आम्हाला शेडमध्ये डांबून ठेवले जात आहे.

बिरसा ब्रिगेडचा आंदोलनाचा इशारा
शासकीय आश्रमशाळा मढ नवीन इमारतीत स्थलांतरित करावी, या प्रकरणात बिरसा ब्रिगेड सह्याद्री शाखा, मुरबाड यांनी बुधवारी (ता. २०) प्रकल्प अधिकारी कार्यालयाव आंदोलन करण्याचा इशारा दिला आहे. आंदोलनाच्या दिवशीही विद्यार्थ्यांना नवीन इमारतीत स्थलांतरित न केल्यास २२ ऑगस्ट रोजी शाळेचे ‘उद्घाटन’ करण्यात येईल, असा इशारा बिरसा ब्रिगेड राष्ट्रीय अध्यक्ष सतिष पेंदाम यांनी दिला आहे.

१५ ऑगस्टला मढ आश्रमशाळा नवीन इमारतीत स्थलांतरित करावी, असे प्रकल्प अधिकारी शहापूर, यांनी मुख्याध्यापकांना लेखी पत्र दिले होते, परंतु प्रकल्प कार्यालय शहापूर यांच्याकडून लेखी आश्वासनाचा विसर पडला असून, आदिवासी मुलांना विनाकारण वेठीस धरले आहे, म्हणून मी शाळेच्या व्यवस्थापन समितीच्या सदस्यपदाचा राजीनामा दिला आहे.
- नारायण सावळा, शालेय व्यवस्थापन समिती, मढ आश्रमशाळा

शासकीय आश्रमशाळेच्या नवीन इमारतीचे उद्घाटन आदिवासी विकासमंत्री यांच्या हस्ते करून लवकरात लवकर विद्यार्थ्यांना नवीन इमारतीमध्ये स्थलांतरित करण्यात येईल.
- डी. डी. काळपांडे, सहाय्यक प्रकल्पअधिकारी, एकात्मिक आदिवासी विकास प्रकल्प शहापूर