ठाण्यात १७ गोविंदा जखमी
दोन मुंबई, एक नवी मुंबईतील गोविंदांचा समावेश
सकाळ वृत्तसेवा
ठाणे, ता. १७ : दहीकाला उत्सवाची पंढरी असलेल्या ठाणेनगरीत शनिवारी रात्री ९ वाजेपर्यंत एकूण १७ गोविंदा जखमी झाले आहेत. यामध्ये पाच आणि १० वर्षीय तीन बालकांचा समावेश आहे. जखमींपैकी पाच ठाणे जिल्हा शासकीय रुग्णालयात, तर १२ ठाणे महापालिकेच्या कळवा येथील छत्रपती शिवाजी महाराज रुग्णालयात उपचारार्थ आणण्यात आले होते. यामध्ये दोन मुंबईतील, तर एक नवी मुंबईतील गोविंदांचा समावेश आहे, तर उर्वरित १४ गोविंदा हे स्थानिक असल्याची माहिती रुग्णालय प्रशासनाने दिली.
हवामान खात्याने वर्तवलेल्या अंदाजाप्रमाणे मुसळधार नाही, पण ठाणे शहरात पावसानेही सकाळपासून संततधार हजेरी लावली होती. त्यातच मोठ्या रकमांची दहीहंडी असल्याने ठाणे, मुंबई आणि इतर आजूबाजूच्या शहरातून विविध गोविंदा पथक ठाणे नगरी दाखल होऊन मानवी मनोरे उभारण्याची कसरत करत होते. ही कसरत करताना काही ठिकाणी पडून रात्री ९ वाजेपर्यंत तब्बल १३ गोविंदा जखमी झाले होते. त्यांना ठामपा आणि जिल्हा शासकीय रुग्णालयात उपचारार्थ आणून त्यांच्यावर उपचार करून काहींना घरी, तर काही उपचारार्थ दाखल करून घेतले होते. जखमी गोविंदांपैकी कोणाच्या डोक्याला, खांद्याला, छातीला, कंबरेला, पाठीला तर कोणाच्या हाताला आणि नाकाला दुखापत झाल्याचे रुग्णालय प्रशासनाने सांगण्यात आले, तर एका बालकाचा हात फ्रॅक्चर झाला आहे.

चौकट
ठामपा रुग्णालयातील जखमींची नावे
आदित्य रघुनाथ वर्मा (१८), कृष्णा मिठू स्वयन (१३), समर बन्सीलाल राजभर (१०), चंदन जैस्वाल (२३), अक्षय शर्मा (२६), सर्वेश चव्हाण (२७), शंकर पाटील (२७), साहिल भोईर(१९), अनुप यादव (३५) हे ठाण्यातील जखमी गोविंदा आहेत. तसेच मुंबईच्या भांडुप येथील निशांत संतोष सावंत (५) आणि सौरभ प्रकाश जाधव (२६) अशी जखमी गोविंदांची नावे आहेत. तसेच अजय परशुराम नरगडे (१५) असे एकमेव जखमी नवीमुंबईतील गोविंदांचे नाव आहे.

चौकट
जिल्हा शासकीय रुग्णालयातील जखमींची नावे
रोहन पागे (२४), कल्पेश पाटील (१७), श्रीराज पवार (१०), करण पवार (१७), सिद्धू सुहास मुंडा (११) अशी ठाण्यातील जखमी गोविंदांची नावे आहेत.